На бягучым тыдні цэны на паліва на аўтамабільных заправачных станцыях у Польшчы знізяцца. У найбольшай ступені адчуюць гэта кіроўцы, якія запраўляюцца бензінам. Падзенне цэнаў – гэта вынік зменаў на міжнародных рынках, у прыватнасці падзення коштаў на сырую нафту і гатовае паліва.
Аналітык парталу e-petrol Якуб Багуцкі(Jakub Bogucki) лічыць, што цэны бензіну і саляркі на заправачных станцыях у Польшчы могуць знізіцца нават на некалькі грошаў:
- Цяперашні сярэдні кошт на бензін і дызельнае паліва, якія складаюць адпаведна – 6 злотых 65 грошаў і 6 злотых 68 грошаў, хутчэй за ўсё, знізяцца ў сярэднім да 6 злотых 60 грошаў для абодвух відаў паліва. Гэта азначае, што на некаторых заправачных станцыях згаданыя цэны будуць яшчэ ніжэйшыя.
Крыху менш, то бок на 2-3 грошы на бягучым тыдні можа знізіцца кошт аўтагазу.
IAR/аз