Кафедра беларусістыкі факультэта прыкладной лінгвістыкі Варшаўскага ўніверсітэта 7 красавіка праводзіць міжнародную навуковую канферэнцыю “Польска-беларускія моўныя, літаратурныя, культурныя і гістарычныя сувязі”.
Канферэнцыю, як плануецца, адкрыюць дэкан факультэта прыкладной лінгвістыкі Варшаўскага ўніверсітэта Агнешка Андрыховіч-Траяноўска, палітык Аляксандр Мілінкевіч і пісьменнік Альгерд Бахарэвіч.
Андрэй Масквін, кіраўнік кафедры беларусістыкі Варшаўскага ўніверсітэта, анансуючы форум, адзначае, што на ім будзе абмяркоўвацца шырокі спектр пытанняў, звязаных з беларускай мовай, літаратурай і культурай.
— Пленарныя сесіі ўключаюць разгляд праблем недахопу ведаў аб Беларусі на Захадзе. Будзе ісці размова пра развіццё беларускай мовы ў розных краінах, у тым ліку пра цяжкасці і перспектывы выкладання яе як замежнай. У прыватнасці, к 10-годдзю працы на кафедры беларусістыкі Варшаўскага ўніверсітэта майстэрні беларусазнаўчай глотадыдактыкі яе кіраўнік Радаслаў Калета раскажа пра дасягнутыя вынікі. У секцыі літаратуры акцэнт будзе зроблены на беларускай драматургіі і літаратуры пасля 2020 года. Альгерд Бахарэвіч, як ганаровы госць, падзеліцца сваім поглядам на развіццё беларускай літаратуры. А пра яго творчасць раскажуць Катажына Дрозд-Урбаньска, Сяргей Кавалёў, Аляксандр Распапоў і інш.
Сярод дакладаў даследчыкаў звяртаюць на сябе ўвагу: Жанны Некрашэвіч-Кароткай «Лацінамоўная спадчына і нацыянальная літаратура: стратэгіі (дэ)кананізацыі», Лілеі Плыгаўкі “Класіфікацыя і шляхі пераадолення тыповых памылак пры вывучэнні беларускай мовы”, Вікторыі Ляшук “Выкладанне беларускай мовы ў Славакіі ў параўнанні з Польшчай”, Марыі Катажыны Прэнэр “Выкарыстанне лацінкі ў Інтэрнэце ў Беларусі і Украіне”. Бэата Сівэк прааналізуе творчасць паэта Алеся Разанава, а Віктар Халіпаў вобразы літоўцаў у творах Уладзіміра Караткевіча.
Паводле А. Масквіна, на канферэнцыі будзе акцэнтавацца ўвага на важнасці захавання беларускай ідэнтычнасці і яе форм — мовы, літаратуры.
Віктар Корбут
Слухайце аўдыё