Польская нафтагазавая кампанія (PGNiG) павялічыць сваю прысутнасць у Нарвегіі. PGNiG Upstram Norway заключыла пагадненне з кампаніяй A/S Norske Shell, дзякуючы якому набудзе акцыі радовішчаў Kvitebjorn і Valemon у Паўночным моры. Як паведамілі ў PGNiG, у згаданых радовішчах пераважае прыродны газ.
Генеральны дырэктар PGNiG Ежы Квяціньскі(Jerzy Kwieciński) сказаў, што цяпер кантракт павінна зацвердзіць нарвежская адміністрацыя. Тады PGNiG будзе мець 32 ліцэнзіі на нарвежскім шэльфе:
- Цяпер мы маем 28 ліцэнзіяў. Такім чынам мы ажыццяўляем палітыку дыверсіфікацыі паставак газу ў Польшчу, а таксама ўмацоўваем нашую пазіцыю на нарвежскім шэльфе. Гаворка ідзе пра тое, каб у будучыні Балтыйскі газаправод ажыццяўляў максімальныя пастаўкі польскага газу.
Ежы Квяціньскі дадаў, што дзякуючы кантракту польская здабуча вуглевадародаў на нарвежскім кантынентальным шэльфе значна павялічыцца:
- Гэта рост на 200 мільёнаў кубічных метраў. Ён азначае, што ў будучым годзе здабуча наблізіцца да мільярда кубічных метраў, то бок складзе 0,9 мільярда кубаметраў.
Раней меркавалася, што здабыча ў наступным годзе складзе 0,7 млрд кубаметраў вуглевадародаў.
Прадстаўнікі PGNiG падкрэслілі, што гэтыя інвестыцыі адпавядаюць палітыцы павышэння энергетычнай бяспекі Польшчы.
аз