Праз тыдзень польскія фермеры плануюць буйную акцыю пратэсту ў цэнтры Варшавы

Паводле арганізатараў, акцыя пратэсту пачнецца ў 11.00 перад Палацам культуры і навукі.

Праз тыдзень польскія фермеры плануюць буйную акцыю пратэсту ў цэнтры Варшавы

PAP/Wojtek Jargiło

Польскія фермеры адтэрмінавалі планаваны на сёння буйны пратэст у Варшаве на будучы аўторак, то бок на 27 лютага. Старшыня Агульнапольскага пагаднення фермерскіх прафсаюзаў і сельскагаспадарчых арганізацый Славамір Іздэбскі(Sławomir Izdebski) паясніў, што змена тэрміну звязаная з пратэстамі іншых сельскагаспадарчых арганізацый:

- Мы не хочам блакаваць самі сябе, то бок каб фермеры, якія зараз пратэстуюць на дарогах, ускладнялі паездкі тым, хто будзе накіроўвацца на пратэст у Варшаву. Мы хочам таксама даць магчымасць удзельнічаць у дэманстрацыі ў Варшаве тым фермерам, якія зараз блакуюць дарогі ў Польшчы. Таму мы памянялі тэрмін акцыі ў Варшаве на 27 лютага.

Паводле арганізатараў, акцыя пратэсту пачнецца ў 11.00 перад Палацам культуры і навукі. У ёй возьмуць удзел і замежныя дэлегацыі, у тым ліку фермеры з Германіі, Нідэрландаў і Літвы.
У сваю чаргу сёння польскія аграрыі плануюць перакрываць асноўныя кальцавыя развязкі ў многіх гарадах краіны.

Нагадваем, польскія фермеры пратэстуюць, між іншым, супраць імпарту ўкраінскай сельскагаспадарчай прадукцыі ў Польшчу і еўрапейскай палітыкі «Зялёнага парадку».

IAR/аз