Еўропа не была падрыхтавана да абмежаванняў з боку Кітая на рэдказямельныя элементы, кажа эканаміст, прафесар Пшэмыслаў Скульскі (Przemysław Skulski) . У выніку амерыкана-кітайскай гандлёвай вайны Пекін увёў абмежаванні на іх экспарт не толькі ў ЗША, але і ў Еўропу.
Прафесар Пшэмыслаў Скульскі сказаў у эфіры Польскага радыё, што гэтыя абмежаванні супалі з ростам уплыву кітайскай аўтамабільнай прамысловасці на Старым кантыненце.
— У многіх галінах, як, нарыклад, фармацэўтычная прамысловасць, гэтая залежнасць таксама гіганцкая, і добра, што нарэшце былі прыняты меры, каб змяніць гэта. А калі гаворка заходзіць пра аўтамабільную прамысловасць, то варта звярнуць увагу на вялікі наступ кітайскіх аўтамабільных кампаній, бачны на еўрапейскім рынку.
Больш за 70 працэнтаў радовішчаў рэдказямельных элементаў знаходзяцца ў Кітаі, і - па розных дадзеных - Пекін кантралюе працэсы, звязаныя з іх перапрацоўкай, на 90 працэнтаў.
Еўрапейская камісія апублікавала спіс з 47 стратэгічных праектаў, якія павінны зрабіць Еўропу незалежнай ад знешніх паставак стратэгічнай сыравіны. У гэты спіс трапілі два польскія праекты.
Гэта завод па перапрацоўцы рэдказямельных элементаў у Пулавах і завод па перапрацоўцы акумулятараў і батарэек у Заверце.
Завод у Пулавах скіраваны на перапрацоўку неадыму, празеадыму і лантана, а завод у Заверце павінен пастаўляць металы з перапрацоўкі батарэй і акумулятараў.
У рамках інвестыцый ЕС на агульную суму 22,5 мільярда еўра Польшча мае шанец стаць ключавым гульцом у сектары стратэгічнай сыравіны, дзякуючы ўдзелу ў трох асноўных сектарах: здабыча, апрацоўка і перапрацоўка.
IAR/яс