У нямецкі суд быў пададзены калектыўны пазоў супраць аўтамабільнага канцэрна Volkswagen ад імя 215 палякаў. Рыхтуюцца заявы яшчэ некалькіх сотняў пазоўнікаў. Гэта наступствы «дызельгейт» (dieselgate) – скандалу, якім польскія суды, дарэчы безвынікова, займаюцца амаль дзесяць гадоў паведамляе Puls Biznesu.
Нагадваем, «дызельгейт», то бок скандал раскрыты ў 2015 годзе амерыканскімі ўладамі, датычыў таго, што вядомы аўтамабільны канцэрн маніпуляваў дадзенымі адносна ўзроўню выкідаў выхлапных газаў.
Скандал каштаваў Групе Volkswagen 33 мільярды еўра ў выглядзе штрафаў, кампенсацыі шкоды і судовых выдаткаў.
26 траўня 2025 года ў судзе ў Браўншвайгу ў Германіі – гэта непадалёк ад Вольфсбурга, дзе знаходзіцца сядзіба нямецкага аўтамабільнага гіганта, завяршыўся працэс, у якім былі асуджаныя чатыры былыя менеджары канцэрна.
Як нагадвае газета, прысуды не канчатковыя, але суд першай інстанцыі прыгаварыў двух з чатырох кіраўнікоў да безумоўнага пазбаўлення волі.
Газета паведамляе, што за некалькі дзён да абвяшчэння згаданага прысуду ў той жа суд паступіў калектыўны пазоў, ад імя 215 палякаў, якія да 22 верасня 2015 года зарэгістравалі ў Польшчы аўтамабілі розных марак, што належаць групе Volkswagen, абсталяваныя рухавікамі EA 189 (у Польшчы былі папулярныя, між іншым, версіі 1.2 TDI, 1.6 TDI і 2.0 TDI).
Зараз рыхтуецца пазоў яшчэ некалькі сотняў чалавек, якія карысталіся або карыстаюцца аўтамабілямі такіх марак, як Volkswagen, Audi, Seat і Skoda.
Магчыма, што ў выніку скандалу пацярпела больш за 10 мільёнаў карыстальнікаў аўтамабіляў групы па ўсім свеце. Большасць з іх паспяхова дамагліся сваіх правоў у нацыянальных судах, але польскія пацярпелыя гадамі не могуць дамагчыся справядлівасці ў польскіх судах, нягледзячы на тое, што канцэрн сваю віну прызнаў.
«Няма рашучай рэакцыі з боку дзяржавы, установам якой – паліцыі і адміністрацыі – канцэрн Volkswagen таксама прадаваў аўтамабілі з падробленым праграмным забеспячэннем», – каментуе ў размове з выданнем Puls Biznesu юрыдычны кансультант, які супрацоўнічае з Польскай асацыяцыяй асоб, пацярпелых ад кампаній групы Volkswagen AG Конрад Кацпржак.
аз