«Еўрастат» пра беспрацоўе: Польшча па-за тройкай лідараў

Усё ж узровень беспрацоўя ў Польшчы ніжэйшы, чым, напрыклад, у Германіі, дзе ў ліпені ён склаў 3,7 працэнта.

Ілюстрацыя

jarmoluk/pixabay.com/CC0 Public Domain

Польшча апынулася па-за тройкай лідараў ЕС, калі гаворка ідзе пра самы нізкі ўзровень беспрацоўя. «Еўрастат» апублікаваў дадзеныя за ліпень.

Згодна з метадалогіяй статыстычнага ўпраўлення ЕС, беспрацоўе ў Польшчы склала 3,1 працэнта, што ставіць яе на чацвёртае месца. Сярэдні паказчык па ЕС складае 5,9 працэнта.

Тэму працягвае карэспандэнтка Польскага радыё Бэата Пламэцка:

- Найлепшы вынік зафіксаваны на Мальце, дзе ў ліпені без працы заставаліся 2,6 працэнта грамадзян. Другое месца заняла Чэхія (2,8 працэнта), а трэцяе Славенія (2,9 працэнта). У сваю чаргу найгорш сітуацыя на рынку працы выглядае ў Іспаніі. Гэта адзіная краіна ў ЕС, у якой паказчык беспрацоўя двухзначны – 10,4 працэнта. Далей ідуць Фінляндыя (9,5 працэнта) і Швецыя (8,7 працэнта). Менш аптымістычна выглядаюць дадзеныя, датычныя беспрацоўя сярод маладых людзей (да 25 гадоў) – толькі ў трох краінах ЕС паказчык не перавышае 10 працэнтаў. Найменш беспрацоўных маладых людзей зарэгістравана ў Германіі і на Мальце – 6,3 працэнта. Польшча апынулася на пятым месцы з беспрацоўем у гэтай групе грамадзян на ўзроўні 12,7 працэнта. На супрацьлеглым канцы апынулася Эстонія з вынікам – 27 працэнтаў беспрацоўных сярод маладых людзей.

IAR/аз