Францыя захоўвае пазіцыю трэцяга па велічыні капіталу замежнага інвестара ў Польшчы. Дадзеныя Французска-польскай гандлёвай палаты паказваюць, што амаль палова французскіх інвестыцый у Польшчы – гэта рэінвестыцыі. На Польшчу прыпадае амаль палова французскіх інвестыцый, размешчаных у Цэнтральнай і Усходняй Еўропе.
Гендырэктарка палаты Яанна Ярах-Пшэнічна (Joanna Jaroch-Pszeniczna) кажа, што сёлета найбольш перспектыўнымі сферамі супрацоўніцтва паміж Польшчай і Францыяй будуць абарона, прамысловасць і энергетыка:
- Несумненна, французска-польскі дагавор падпісаны ў Нансі ў траўні мінулага года акрэсліў асноўныя сферы, у якіх будзе развівацца гэтае супрацоўніцтва. Гаворка ідзе пра абарону, прамысловасць і энергетыку – ядзерную, вядома, але таксама аднаўляльныя крыніцы энергіі і ўсё, што звязана з прамысловай дэкарбанізацыяй. Гаворка ідзе пра транспарт, авіяцыю, такія сферы, як лічбаванне, штучны інтэлект.
Паводле ацэнак, у Польшчы працуе каля 1 200 кампаній з французскім капіталам. Яны працаўладкоўваюць амаль 230 000 чалавек.
IAR/аз