Прадстаўнікі апазіцыі паведамляюць, што з ёй няма сувязі ўжо некалькі дзён, у панядзелак стала вядома, што яе мабільны тэлефон з 19-га сакавіка знаходзіцца ў Беларусі. Гэты выпадак можа нанесці вялізарную шкоду для апазіцыйнага руху, перакананы эксперт.
28 сакавіка старшыня Народнага антыкрызіснага ўпраўлення Павал Латушка паведаміў, што з 25 сакавіка адсутнічае сувязь са спікерам Каардынацыйнай рады Беларусі Анжалікай Мельнікавай. Палітык дадаў, што падаў афіцыйную заяву ў праваахоўныя органы Польшчы аб знікненні спікера КР.
У адказ на гэта польскія службы заявілі, ужо некалькі тыдняў Мельнікава знаходзіцца за межамі Польшчы. Інфармацыю пацвердзіла Міністэрства ўнутраных спраў і адміністрацыі Польшчы.
У панядзелак Павал Латушка паінфармаваў СМІ, што з 19-га сакавіка тэлефон Анжалікі Мельнікавай знаходзіцца на тэрыторыі Беларусі. Выданне «Наша Ніва» высветліла, спікера КР кантралявала доступ да рахункаў Каардынацыйнай рады, і «Кіберпартызанаў».
Паўсталая сітуацыя негатыўна паўплывае на настроі беларусаў за мяжой ды сведчыць пра аслабленне альтэрнатыўных Лукашэнку беларускіх палітычных структуру ў эміграцыі, перакананы палітолаг Павал Усаў.
— Гэта не першая сітуацыя, такія здарэнні ўжо былі з Чорнай кнігай Беларусі, з Тацянай Зарэцкай – фінансавым міністрам у кабінеце Ціханоўскай, яшчэ потым праблемы ў Байполе. Гэта прычынілася да дыскрэдытацыі апазіцыйных структур. У выніку апазіцыйнасць сёння не заўсёды азначае дэмакратычнасць.
Наколькі бяспечна быць сёння ў апазіцыі? Нават за мяжой?
— З 2020-га году вядома пра пагрозу, толькі людзі адарваныя ад рэчаіснасці маглі ў апазіцыі бачыць бяспечную прыгоду ды нейкія прафіты. Далучэнне да шэрагаў апазіцыі азначае вялікую рызыку. Той, хто не гатовы адрачыся да камфорту, бяспекі, не павінен гэтым займацца. Апазіцыйнасць азначае рызыку не толькі для цябе, але і для тваёй сям’і ды блізкіх.
Ці цяперашняя сітуацыя можа выклікаць яшчэ больш негатыўныя наступствы для апазіцыі?
— Калі адкрыецца ўсё больш дэталяў пра сітуацыю, можа адбыцца скарачэнне падтрымкі для апазіцыйных структур, яны пачнуць развальвацца. Гэта будзе поспех рэжыму, які аслабіць веру ў альтэрнатыву Лукашэнку ды магчымасці змен у краіне.
Размаўляў Юры Ліхтаровіч