У прыватнасці адбылася сустрэча Святланы Ціханоўскай з кіраўніком Міжнароднай арганізацыі працы (МАП) Жыльбэрам Унгбо.
Ціханоўская распавяла пра апошнюю хвалю рэпрэсій супраць беларускіх працоўных, адзначыла пастаянныя парушэнні іх правоў. Яны абмеркавалі апошнія прысуды лідарам незалежных прафсаюзаў, у тым ліку справу Аляксандра Ярашука, які таксама з'яўляецца чальцом кіроўнай рады МАП.
Кіраўнік МАП запэўніў Ціханоўскую, што арганізацыя пад яго кіраўніцтвам будзе трымаць Беларусь у фокусе і настойваць на спыненні рэпрэсій супраць працоўных і вызваленні ўсіх зняволеных прадстаўнікоў рабочага руху.
Ціханоўская выказала спадзяванне, што гэта хоць прымяненне артыкулу 33 Статуту МАП у дачыненні да Беларусі і крайняя мера, але яна дапаможа вызваліць працоўных і прафсаюзных лідараў з турмаў. Ціханоўская запэўніла, што ў найбліжэйшы час дэмакратычныя сілы прадставяць у МАП прапановы па рэалізацыі 33-га артыкулу, які прымяняецца ў дачыненні да краінаў, якія сістэматычна не выконваюць патрабаванні і рэкамендацыі МАП.
Артыкул 33 Статуту МАП гучыць так:
«Калі які-небудзь член Арганізацыі не выканае ва ўстаноўлены тэрмін рэкамендацыі, якія могуць змяшчацца ў дакладзе вышэйзгаданай камісіі (Камісія адмыслова ствараецца для расследавання пэўных выпадкаў. – Рэд.) або ў рашэнні Міжнароднага Суда, то Адміністрацыйная рада можа рэкамендаваць Канферэнцыі такія дзеянні, якія ён палічыць мэтазгоднымі для забеспячэння выканання гэтых рэкамендацый».
Паводле Прэс-службы Офіса Святланы Ціханоўскай / вх