Эксперты амерыканскага Інстытуту вывучэння вайны (ISW) мяркуюць, што інфармацыйная сістэма абмену звесткамі аб замежных грамадзянах і асобах без грамадзянства пашырыць магчымасці расійскіх праваахоўных органаў, заўважыла Радыё Свабода.
«Савет міністраў Беларусі зацвердзіў пастанову, што вызначае парадак функцыянавання інфармацыйнай сістэмы, якая дасць магчымасць дзяржаўным органам Расіі і Беларусі абменьвацца інфармацыяй у памежных пунктах пропуску і пацвярджаць сапраўднасць дакументаў, якія пацвярджаюць асобу, у тым ліку замежных грамадзян і асоб без грамадзянства, якія пражываюць на тэрыторыі саюзнай дзяржавы. Гэтая сістэма абмену звесткамі, імаверна, пашырыць магчымасці расійскіх праваахоўных органаў у іхнай дзейнасці ў Расіі», — адзначаецца ў справаздачы ISW за 4 красавіка.
У 2017 годзе Беларусь і Расія падпісалі пратакол пра абмен звесткамі аб «невыязных» беларусах і расіянах, але абмен інфармацыяй аб іншаземцах не быў унармаваны, хоць беларускія памежнікі адмаўлялі ім ва ўездзе — найперш грамадзянам Украіны.
З 11 студзеня 2025 году пачало дзейнічаць пагадненне паміж Беларуссю і Расіяй аб узаемным прызнанні візаў. Цяпер іншаземцы з беларускай візай могуць падарожнічаць у Расію, а з расійскай — у Беларусь, у тым ліку праз шэраг наземных пунктаў пропуску. Пры гэтым для ўкраінскіх грамадзян захоўваецца «асаблівы парадак уезду» ў Расію — праз пункт пропуску ў маскоўскім аэрапорце Шарамецева і аўтамабільны пункт пропуску Лудонка ў Пскоўскай вобласці.
12 сакавіка 2025 году Аляксандр Лукашэнка падпісаў указ № 107 «Аб інфармацыйнай сістэме абмену звесткамі аб замежных грамадзянах і асобах без грамадзянства», накіраваны на рэалізацыю беларуска-расійскага міжурадавага пагаднення аб узаемным прызнанні візаў. Указам прадугледжанае стварэнне інфармацыйнай сістэмы абмену звесткамі аб перасячэнні мяжы ў пунктах пропуску, аб выдадзеных і канфіскаваных (ці ануляваных) дакументах на права ўезду і выезду (транзіту), а таксама пасведчанняў асобы замежных грамадзян і асобаў без грамадзянства на тэрыторыі «саюзнай дзяржавы». Такую сістэму мелі стварыць да 1 красавіка.
4 сакавіка ўрад Беларусі зацвердзіў палажэнне аб парадку функцыянавання інфармацыйнай сістэмы абмену з Расіяй звесткамі аб іншаземцах. Яна пачынае дзейнічаць з 5 красавіка.
яс