Сёлета ў беларускіх ВНУ істотна знізіліся прахадныя балы на шэрагу медыцынскіх спецыяльнасцяў, а дзяржава павялічыла набор на мэтавае навучанне. Паводле «Радыё Свабода», на педыятрычным факультэце БДМУ прахадны бал знізіўся з 368 да 319, а на фармацэўтычным — з 381 да 283. Пры гэтым набор на мэтавае навучанне павялічылі з 5,3 да 6,3 тысячы месцаў, а колькасць бюджэтных месцаў для медыкаў — больш чым на 700.
Эксперты звязваюць зніжэнне балаў з адтокам насельніцтва, змяншэннем колькасці выпускнікоў і пяцігадовай адпрацоўкай пасля мэтавага навучання. У Віцебскім медуніверсітэце конкурс на спецыяльнасці сфармаваўся толькі напрыканцы прыёмнай кампаніі.
Найбольшыя наборы сёлета запланавалі на інжынерныя, педагагічныя, медыцынскія і аграрныя спецыяльнасці. Аднак сярод абітурыентаў найбольшай папулярнасцю карыстаюцца «Міжнародная эканоміка», «Міжнародныя адносіны» і «Графічны дызайн».
эж