Рэжым у Мінску спрабуе крыміналізаваць любыя праявы міжнароднай актыўнасці і ўвагі да Беларусі, зазначаюць праваабаронцы з цэнтру «Вясна».
На канец жніўня 2026 года ў Беларусі існуе 376 «экстрэмісцкіх фармаванняў» — і як мінімум 19 з іх звязаныя з замежнымі арганізацыямі.
Геаграфія пераследу пашырылася на ўвесь свет — ад суседняй Польшчы да далёкага Лас-Вегаса, тэматыка — ад медыя па адукацыю. Толькі за няпоўны 2026 год мінімум 70 інфармацыйных крыніц, якія маюць дачыненне да замежнікаў або дыяспар, былі прызнаныя экстрэмісцкімі.
Так у сакавіку 2026 года пад забарону трапілі BBC News (руская служба), «Голас Амерыкі» (VOA) і «Новая газета Еўропа». У чэрвені да іх далучыўся інтэрнэт-партал Voxeurope, у ліпені ды жніўні «экстрэмістамі» сталі партал Jam NEWS, Польскае агенцтва друку PAP, эстонскае выданне Postimees і сусветны гігант Euronews.
Пры гэтым рашэнні супраць замежных рэсурсаў, аб прызнанні іх «экстрэмісцкімі матэрыяламі», прымаюць рэгіянальныя суды ў Беларусі. Сёлета абсалютным лідарам у дадзенай справе стаў суд Глускага раёну – на яго рахунку 14 такіх рашэнняў. Пераважна ў лютым суд прызнаваў «экстрэмісцкімі» матэрыялы, звязаныя з дыяспарамі і «Народнымі пасольствамі».
На другім месцы — суд Горацкага раёну з 11 рашэннямі. Ён спецыялізуецца на буйных СМІ і праваабарончых рэсурсах. Трэці — суд Нясвіжскага раёну, які ў красавіку паставіў на паток забарону суполак дыяспар, выносячы 10 рашэнняў.
Крыніца: ПЦ «Вясна»/юл