Беларускія абаронцы правоў чалавека звяртаюцца да былых палітвязняў: дапамажыце даведацца пра стан і месцазнаходжанне тых, хто застаўся за кратамі. Яны просяць паведаміць пра людзей, з якімі тыя, хто ўжо выйшаў, адбываў пакаранне ў СІЗА, калоніі і ШІЗА, ды падзяліцца ёй з праваабаронцамі.
Праверыць актуальны спіс і статус зняволеных можна ў табліцы палітвязняў ПЦ «Вясна».
Праваабаронцы адзначаюць, што для іх важная любая інфармацыя: дзе зараз знаходзіцца чалавек, ці змяніўся яго статус альбо месца ўтрымання (этапаванне, ШІЗА, ПКТ), у якім ён псіхалагічным і фізічным стане і гэтак далей.
— Рэжым робіць усё, каб стварыць вакол палітвязняў інфармацыйны вакуум і сцерці іх імёны з парадку дня. Менавіта ваша ўважлівасць і салідарнасць дапамагаюць прабіць гэтую сцяну маўчання. Дзякуючы вам сваякі даведваюцца праўду пра сваіх блізкіх, а свет бачыць рэальны стан рэчаў. Ваша дапамога — гэта рэальны шанец абараніць тых, хто пакуль не можа прамовіць за сябе сам, — падсумоўваюць аўтары звароту.
ПЦ «Вясна»/нг