Расійскія ўдарныя беспілотнікі працягваюць парушаць паветраную прастору Беларусі. За 19–20 кастрычніка зафіксавана прынамсі чатыры такія выпадкі, прычым лёс двух дронаў застаецца невядомым.
Як паведамляе незалежнае гомельскае выданне «Флагшток» са спасылкай на ўкраінскіх назіральнікаў, 20 кастрычніка два рэактыўныя беспілотнікі з інтэрвалам менш за дзве гадзіны накіраваліся з Жытомірскай вобласці Украіны ў бок беларускіх Лельчыцаў.
Паведамленняў пра іх вяртанне ва Украіну няма. Не выключаецца, што апараты ўпалі або былі збітыя на тэрыторыі Беларусі, аднак пацвярджэння гэтаму няма.
Яшчэ два беспілотнікі заўважылі ў раёне Брагіна і Хойнікаў.
Залёты адбываюцца ўсё часцей: у верасні расійскія дроны парушалі паветраную прастору Гомельшчыны не менш як 21 раз. Гэта месячны рэкорд сёлета.
эж