У Познані хвілінай маўчання аддалі даніну памяці лекару, які тыдзень таму ў Кракаве быў смяротна паранены пацыентам на працы.
Сёння – дзень жалобы ва ўстановах аховы здароўя ва ўсёй краіне. У Познані (заходняя Польшча) канферэнцыя, прысвечаная экстраннай медыцыне, пачалася хвілінай маўчання. Сённяшні дзень – сімвалічны момант як для лекараў, так і пацыентаў, сказаў намеснік старшыні рэгіянальнай лекарскай палаты Марцін Каралеўскі.
- Трагедыя ў Кракаве – гэта вынік таго, што раней не было сур’ёзнай рэакцыі на агрэсію, у тым ліку фізічную, у адносінах да медыкаў. І гэта прывяло да таго, што здарылася ў Кракаве. Мы гаворым «не – насіллю ў ахове здароўя».
У аўторак, 29 красавіка, 35-гадовы мужчына ўварваўся ў кабінет Томаша Салецкага, артапеда Кракаўскага ўніверсітэцкага шпіталя, калі там знаходзіўся іншы пацыент. Ён ударыў лекара нажом.
Пасля нападу ўрач трапіў у рэанімацыю. Рэанімацыйныя мерапрыемствы працягваліся дзве гадзіны, але выратаваць лекара не ўдалося. Злачынцу затрымала ахова бальніцы і перадала паліцыі.
Томаш Салецкі. Крыніца: PAP/Art Service
Томаш Салецкі спецыялізаваўся на хірургіі рукі, лічыўся адным з лепшых спецыялістаў у Кракаўскім універсітэцкім шпіталі.
вс