У сераду, 4 сакавіка, у Варшаве афіцыйна адкрыўся Цэнтр касмічных аперацый УС Польшчы, які дзейнічае ў структуры Агенцтва геапрасторавай разведкі і спадарожнікавых паслуг, падпарадкаванага Міністэрству нацыянальнай абароны Польшчы. Новая інфраструктура прызначана для кантролю польскіх спадарожнікаў і кіравання касмічнымі місіямі.
Цэнтр будзе займацца маніторынгам стану спадарожнікаў, планаваннем манеўраў на арбіце і аналізам атрыманых дадзеных. Намеснік міністра абароны Цэзары Томчык падкрэсліў:
«У апошні час значна павялічылася колькасць спадарожнікаў у космасе, і іх сутыкненні адбываюцца ўсё часцей. Цэнтр касмічных аперацый прадухіляе такія сітуацыі і існуе для таго, каб мы маглі гарантаваць бяспеку нашай інфраструктуры, а таксама інфраструктуры нашых саюзнікаў».
Адначасова ў горадзе Лешна ствараецца Цэнтр падтрымкі спадарожнікавых сістэм, адкуль будуць кіраваць касмічнымі аперацыямі, а варшаўскі цэнтр стане галоўным камандным элементам усёй сістэмы.
iar/эж