Польскія знішчальнікі перахапілі расійскі разведвальны самалёт над Балтыйскім морам. Аператыўнае камандаванне відаў Узброеных сіл Польшчы паведаміла, што самалёт не парушыў паветраную прастору Польшчы. Паводле заявы, сёлета расійскі самалёт Іл-20 выконваў сваю дзявятую разведвальную місію ў гэтым раёне. Ён ляцеў без паведамлення пра план палёту і з выключаным транспондэрам.
Польскія знішчальнікі МіГ-29 «паспяхова перахапілі, ідэнтыфікавалі і суправаджалі расійскі разведвальны самалёт». Аператыўнае камандаванне падкрэсліла, што аперацыі былі праведзены хутка «дзякуючы высокай гатоўнасці дзяжурных сіл, вопыту пілотаў і эфектыўнай працы сістэмы супрацьпаветранай абароны».
— Жаўнеры Войска Польскага штодня забяспечваюць бяспеку польскага неба, выконваючы свае абавязкі з поўнай самаахвярнасцю, а Узброеныя сілы знаходзяцца ў пастаяннай гатоўнасці рэагаваць на любыя пагрозы нашай паветранай прасторы, — чытаем у заяве Аператыўнага камандавання відаў Узброеных сіл Польшчы.
IAR/аз