Міністр спорту і турызму Польшчы Якуб Рутніцкі асудзіў рашэнне Міжнароднага алімпійскага камітэта часова скасаваць адхіленне Алімпійскага камітэта Расіі, якое дзейнічала з кастрычніка 2023 года. У МАК патлумачылі гэта тым, што расійскі бок больш не ўключае ў свой склад спартыўныя арганізацыі з акупаваных украінскіх тэрыторый.
Паводле Рутніцкага, расійская агрэсія супраць Украіны патрабуе асаблівай адказнасці і ў сферы міжнароднага спорту. Паляк падкрэсліў, што рашэнне МАК не паўплывае на пазіцыю Варшавы: у Польшчы па-ранейшаму будзе дзейнічаць забарона на ўдзел расійскіх і беларускіх спартоўцаў пад дзяржаўнымі сцягамі і з выкананнем дзяржаўных гімнаў.
Адначасова МАК рэкамендаваў міжнародным федэрацыям спрасціць допуск расійскіх атлетаў да адбору на Алімпіяду-2028, адмяніўшы праверку іх палітычных поглядаў. Пратэст супраць гэтага рашэння таксама выказала Літва.
Нагадаем, у траўні 2026 года МАК ужо рэкамендаваў зняць абмежаванні для беларускіх спартоўцаў, у тым ліку адносна выкарыстання дзяржаўнай сімволікі.
iar/pap/ez