Міністр замежных спраў Расіі Сяргей Лаўроў заявіў дзяржсакратару ЗША Марка Рубіа, што Масква гатовая «працаваць разам» з Вашынгтонам над «ліквідацыяй даўніх прычын канфлікту ва Украіне», паведамляе Reuters са спасылкай на апублікаваную ў чацвер заяву МЗС Расіі.
Раней Дзярждэпартамент ЗША паведаміў, што Рубіа праінфармаваў Сяргея Лаўрова па тэлефоне аб перамовах у чацвер у Парыжы, у якіх прынялі ўдзел прадстаўнікі ЗША, Украіны, Вялікабрытаніі, Германіі і Францыі.
Як гаворыцца ў заяве МЗС РФ, Лаўроў пацвердзіў гатоўнасць Масквы «працягваць сумесна з амерыканскімі калегамі працу па ліквідацыі першапрычын украінскага крызісу».
Reuters нагадвае, што Расія паслядоўна паўтарае, што яе ўмовы спынення вайны ўключаюць у сябе, сярод іншага, афіцыйнае прызнанне Украінай анексіі чатырох абласцей і адмову ад любых намераў далучыцца да НАТА.
PAP/юл