Урад Талібану ў рамках новых правілаў выдаліў з афганскіх універсітэтаў кнігі, напісаныя жанчынамі і іранцамі. Адмяняецца таксама выкладанне па правах чалавека і сексуальным дамагальніцтве, паведаміла BBC.
Улады паведамілі таксама ўніверсітэтам, што яны больш не могуць выкладаць 18 прадметаў. Адзін з чыноўнікаў Талібану растлумачыў, што яны «супярэчаць прынцыпам шарыяту (ісламскага права) і палітыцы сістэмы».
Талібы выдалілі з універсітэтаў 680 кніг, 140 з якіх былі напісаны жанчынамі. Сярод забароненых твораў, напісаных жанчынамі, была «Бяспека ў хімічнай лабараторыі».
BBC паведаміла, што на гэтым тыдні доступ да Інтэрнэту быў рэзка абмежаваны як мінімум у 10 правінцыях. Чыноўнікі сцвярджаюць, што гэты крок быў накіраваны на прадухіленне амаральнасці.
Нягледзячы на тое, што гэтыя правілы паўплывалі на многія аспекты жыцця, жанчыны і дзяўчаты пацярпелі асабліва моцна: яны больш не могуць працягваць адукацыю пасля шостага класа, і адзін з апошніх шляхоў для далейшай адукацыі знік у канцы 2024 года, калі курсы акушэрства былі ціха адмененыя.
Шэсць з 18 забароненых у цяперашні час прадметаў звязаны з жанчынамі, у тым ліку гендар і развіццё, роля жанчын у камунікацыі і сацыялогія жанчын.
Урад Талібану заявіў, што паважае правы жанчын у адпаведнасці з уласнай інтэрпрэтацыяй афганскай культуры і ісламскага права.
Закія Адэлі, былая намесніца міністра юстыцыі, чые кнігі былі ўнесены ў чорны спіс, не была здзіўлена гэтым рашэннем.
«Улічваючы (...) мізагіністычны менталітэт і палітыку Талібану, натуральна, што калі жанчынам не дазваляюць вучыцца, іх погляды, ідэі і творы таксама падаўляюцца», — сказала яна.
Амаль палова забароненых кніг гэта творы іранскіх аўтараў і кнігі іранскіх выдаўцоў. Адзін з членаў камітэта, які разглядаў назвы кніг, заявіў BBC, што мэтай выдалення назваў было «прадухіліць пранікненне іранскага кантэнту ў афганскую праграму навучання».
PAP/яс