Ватыкан нядаўна абвясціў аб запуску сістэмы перакладу імшы ў рэжыме рэальнага часу, якая працуе на мадэлі штучнага інтэлекту. Новая паслуга будзе падтрымліваць 60 моў і дэбютуе падчас асноўных урачыстасцей у базіліцы Святога Пятра, прымеркаваных да 400-годдзя яе асвячэння.
Праект мае на мэце даць вернікам магчымасць сачыць за літургіяй з дапамогай сваіх смартфонаў, што можа значна змяніць спосаб іх удзелу ў міжнародных касцёльных урачыстасцях.
Праект мае на мэце спрыяць больш поўнаму ўдзелу ў літургіі для вернікаў з усяго свету. Базіліка стагоддзямі аб'ядноўвае людзей розных нацыянальнасцей і моў, і новы інструмент прызначаны для служэння ўніверсальнай місіі Касцёла.
Сістэма будзе даступная праз QR-коды, размешчаныя ля ўваходаў у Ватыкан. Пасля іх сканавання ўдзельнікі набажэнстваў атрымаюць доступ да тэкставых і аўдыяперакладаў у сваіх браўзерах без неабходнасці ўсталёўваць дадатковае прыкладанне.
Як заявіў кардынал Маўра Гамбэці: «Сёння мы бачым магчымасць пераадолення моўных барʼераў у рэжыме рэальнага часу, рэалізаваную ў адным з самых значных месцаў, якія толькі можна сабе ўявіць».
Гэта яшчэ адзін крок Ватыкана да лічбавых інавацый. Святы Пасад гадамі інвестуе ў праекты лічбавізацыі, у тым ліку робіць архівы і дакументы даступнымі ў Інтэрнэце, а таксама развівае прысутнасць у сацыяльных сетках.
Нягледзячы на тое, што Ватыкан тэстуе практычнае прымяненне штучнага інтэлекту, ёсць і галасы, якія заклікаюць да асцярожнасці. Папа Леў XIV у 2025 годзе адзначыў, што штучны інтэлект выклікае сурʼёзныя пытанні аб абароне чалавечай годнасці, сацыяльнай справядлівасці і будучыні працы. Таму Царква імкнецца спалучаць адкрытасць да тэхналогій з роздумам пра этыку.
PolsatNews/ав