Расія будуе новыя ваенныя базы ўздоўж сваёй мяжы з НАТА і пашырае існуючыя падраздзяленні, каб пасля заканчэння вайны з Украінай засяродзіць у гэтым раёне 115 тыс. вайскоўцаў, паведамілі ў сераду грамадскія тэлерадыёкампаніі Скандынавіі і эстонскія СМІ. Пра гэта піша Польскае агенцтва друку PAP.
Журналісты шведскай грамадскай тэлерадыёкампаніі SVT, дацкай DR, нарвежскай NRK і эстонскага партала Delfi прааналізавалі спадарожнікавыя здымкі частак расійскай тэрыторыі з дапамогай экспертаў. СМІ параўналі апошнія здымкі з выявамі, атрыманымі ў перыяд з 2024 па 2025 год. На здымках бачныя новыя казармы, доўгія шэрагі вайсковай тэхнікі і склады зброі.
Па словах былога афіцэра фінскай ваеннай разведкі Марка Эклунда, мэта пашырэння ваенных аб'ектаў у Расіі – стварэнне месцаў для дзясяткаў тысяч салдат. Расейскія ўзброеныя сілы плануецца засяродзіць на поўнач ад нарвежскай мяжы і ўздоўж фінскай мяжы, дзе колькасць расійскіх сухапутных войскаў, як чакаецца, павялічыцца з 20 тыс. да 80 тыс. чалавек. Далейшыя кропкі канцэнтрацыі ўключаюць краіны Балтыі і Калінінградскую вобласць, размешчаную паміж Польшчай і Літвой. У горадзе Балтыйск назіраецца вялікая колькасць вайсковай тэхнікі.
Акрамя таго, зазначаецца, што Расія можа перакінуць сотні тысяч вопытных салдат з іншых рэгіёнаў краіны на працягу некалькіх тыдняў. Шведская ваенная разведка MUST ацэньвае агульную колькасць расійскіх узброеных сіл у 1 млн 500 тыс. чалавек.
Скандынаўскія СМІ дадаюць, што пераўзбраенне Расіі таксама ўключае змену структуры ўзброеных сіл. Рэформа прадугледжвае пераход ад утрымання невялікіх баявых груп да буйных дывізій колькасцю да 10 тыс. салдат. Акрамя таго, вопыт расійскіх ваенных дзеянняў, у тым ліку выкарыстанне беспілотнікаў, уяўляе сабой сурʼёзную праблему.
«Мы мяркуем, што пасля заканчэння вайны ва Украіне на нашай мяжы будзе іншая Расія», – падкрэсліў генерал Эйрык Крыстаферсен, камандуючы Узброенымі сіламі Нарвегіі.