«Ніякіх скарачэнняў бюджэту ЕС» — папярэджваюць 17 краін, у тым ліку Польшча. Гэта так званая група «Сябры згуртаванасці», якая абараняе фінансаванне рэгіянальнага развіцця і сельскай гаспадаркі. Лідары гэтых краін сустрэліся ў Бруселі перад самітам ЕС і апублікавалі сумесную заяву.
Заява з'яўляецца заклікам да амбіцыйнага і справядлівага будучага бюджэту Еўрапейскага Саюза.
Лідары 17 краін напісалі, што новы праект бюджэту значна скарочаны. Маецца на ўвазе прапанова ірландскага старшынства аб скарачэнні на 8%, на 141 мільярд еўра.
Група «Сябры згуртаванасці» не пагаджаецца на скарачэнні. Краіны падкрэслілі, што новы бюджэт павінен улічваць існуючыя і новыя прыярытэты, захоўваючы пры гэтым ключавыя кірункі – рэгіянальны і сельскагаспадарчы. Лідары 17 краін таксама падкрэслілі сваю гатоўнасць да канструктыўных перамоваў аб выплатах з бюджэту ЕС для паасобных краін. Аднак яны чакаюць справядлівага і збалансаванага размеркавання сродкаў паміж усімі краінамі і зазначаюць, што нельга абцяжарваць больш бедныя краіны.
Напрыклад, Польшча і Чэхія лічаць несправядлівай прапанову перавесці частку даходаў ад ETS — сістэмы збораў за выкіды вуглякіслага газу — у агульны фонд ЕС. Яны выкарыстоўваюць гэтыя сродкі на развіццё зялёнай энергіі.
Група «Сябры згуртаванасці» выставіла патрабаванне аб ліквідацыі скідак на ўзносы ў бюджэт ЕС краінам, якія імі карыстаюцца і патрабуюць значнага скарачэння выдаткаў.
У дыскусіі за бюджэт ЕС на 2028-2034 гады з аднаго боку — краіны, якія імкнуцца да скарачэння выдаткаў, вядомыя як «скнары», у тым ліку Германія, Нідэрланды і Швецыя, на другім — астатнія.
Польшча павінна атрымаць 123 мільярды еўра і стаць найбуйнейшым бенефіцыярам сродкаў ЕС. А краіны «скнары», ужо патрабуюць скарачэнняў у сельскай гаспадарцы і на рэгіянальнае развіццё.
IAR/яс