Каміль С. вінаваты ў здзеках над пумай Нубіяй. Абвінавачаны таксама быў прызнаны вінаватым па астатніх абвінавачаннях, гэта значыць у тым, што ён падвергнуў небяспецы некалькі чалавек, выпусціўшы пуму з клеткі, выкарыстаўшы пуму ў камерцыйных мэтах без адпаведных дазволаў і не вярнуўшы яе ў Познаньскі заапарк пасля таго, як суд вынес рашэнне аб яе канфіскацыі.
Прысудам, вынесеным на гэтым тыдні, завяршаецца рэзанансная справа, якая трапіла ў раённы суд у Заверці пасля таго, як летам 2020 года Каміль С. уцёк з пумай у лес.
Анна Плашчык з фонду Viva! расказвае, што справа цягнулася шмат гадоў. Фонд даведаўся пра справу ў 2016 годзе, калі ўладальнік актыўна пісаў у сацыяльных сетках, наведваў паказы мод з пумай, хадзіў на здымачныя пляцоўкі, удзельнічаў у рэкламных роліках, музычных кліпах, а таксама наведваў бальніцы, турмы і шпацыраваў з пумай па вуліцах. Гэты выпадак занепакоіў актывістаў па шэрагу прычын.
- Па-першае, таму што прыватная асоба ў Польшчы не можа і ніколі не магла валодаць пумай. Такія правілы. Гэта жывёла з першай катэгорыі небяспекі, гэта значыць самая небяспечная для здароўя і жыцця чалавека. І ў нейкі момант гэты чалавек знік з нашых радараў і зноў з’явіўся праз некалькі гадоў, калі ўжо жыў на Кракаўска-Чэнстахоўскім узвышшы каля Аградзенца. Мы апавясцілі праваахоўныя органы, што ёсць чалавек, які незаконна ўтрымлівае пуму. Так і пачалося. Следства было накіравана ў суд па справе аб незаконным валоданні. Суд прызнаў, што Каміль С. незаконна валодаў жывёлай, паколькі ён ніколі не кіраваў цыркам і зарэгістраваў цырк толькі для таго, каб абысці закон і мець магчымасць трымаць пуму. Суд прызначыў канфіскацыю гэтай жывёлы. Калі прысуд уступіў у законную сілу, мы даведаліся, што Каміль С. схаваўся з пумай у лесе. Мы нават атрымалі фатаграфію пумы, зачыненай у маленькай транспартнай клетцы пасярод лесу, з інфармацыяй, што пума была там адна, без чалавека, які б пра яе клапаціўся. Мужчына хаваўся так шмат месяцаў.
фота: фонд Viva!
Праз некалькі месяцаў супрацоўнікі Познаньскага заапарка знайшлі пуму ў той жа маленькай транспартнай клетцы пасярод лесу. Аднак з'явіўся гаспадар, выняў пуму з клеткі і ўцёк з ёй у лес. Пра гэта казала ўся Польшча.
Так пачалася крымінальная справа аб здзеку ў дачыненні да пумы. Анна Плашчык тлумачыць, чаму яны лічаць, што гэта здзек:
- Бо пума ўтрымлівалася ва ўмовах, якія не дазвалялі ёй задавальняць натуральныя патрэбы гатунку. У яе не было ні месца адпачынку, ні месца, дзе б яна магла адасобіцца ад свету. Яе трымалі разам з іншымі відамі, у тым ліку сабакам, коткай, а таксама людзьмі і вельмі маленькім дзіцём у вельмі вузкай прасторы. Месца выгулу нагадвала сметнік. Гэта былі надзвычай цяжкія ўмовы, прыніжальныя для гэтай жывёлы.
І праблема ў тым, што гэты чалавек, паказваючы, што ў яго ёсць пума, пэўным чынам прапагандаваў валоданне дзікімі, небяспечнымі жывёламі. Ён паказваў, наколькі гэта крута. Якім крутым чалавекам можна быць, калі ў цябе ёсць такая жывёла. На шчасце, раённы суд у Заверці не паверыў у гісторыю, што ён любіць пуму, а пума любіць яго.
Рэкамендацыі адносна ўтрымання пумы ў польскіх законах вельмі строгія. Гэтыя ўмовы таксама можна атрымаць з навуковай літаратуры. У ёй гаворыцца, што пума - адзіночка, што ёй патрэбны спакой, ёй патрэбны схованкі, ёй патрэбны адпачынак, ізаляваны ад свету і, вядома, ад іншых відаў.
Вынесены прысуд – адзін год пазбаўлення волі з адтэрміноўкай на два гады. Анна Плашчык кажа, што гэта незадавальняючы прысуд, але гэта агульная праблема, якая тычыцца ўсіх выпадкаў здзеку над жывёламі.
- Гэтае рашэнне важнае па многіх прычынах, у тым ліку таму, што яно мае адукацыйны характар і дзякуючы яму, верагодна, нікому ў Польшчы больш ніколі не прыйдзе ў галаву трымаць дома такую вялікую і небяспечную жывёлу.
Прысуд не з'яўляецца канчатковым. Пума Нубія цяпер знаходзіцца ў заапарку ў Хожаве.
ав
слухайце аўдыё