Амерыканская кампанія Maxar Technologies адключыла доступ Украіны да сваіх спадарожнікавых здымкаў. Пра гэта ўкраінскаму выданню «Мілітарны» паведамілі некалькі карыстальнікаў сэрвісу на ўмовах ананімнасці.
Карыстальнікі падзяліліся з «Мілітарным» лістом пад загалоўкам «Ваш уліковы запіс быў прыпынены», які яны атрымалі ад кампаніі.
Прычынай у лісце называецца «адміністрацыйны запыт»; выданне звязвае адключэнне з рашэннем Вашынгтона перастаць дзяліцца разведдадзенымі з Кіевам. Прыпыненне ўліковых запісаў закранула як урадавых, так і прыватных карыстальнікаў.
Maxar - адзін з галоўных камерцыйных пастаўшчыкоў спадарожнікавых здымкаў. Украінскія вайскоўцы, у прыватнасці, выкарыстоўвалі дадзеныя са здымкаў для сачэння за перамяшчэннем расійскіх войскаў, а сусветныя СМІ выкарыстоўваюць здымкі Maxar для ілюстрацыі і аналізу баявых дзеянняў, адзначае «Мілітарны».
нг