Вёска Бжузкі ў Куяўска-Паморскім ваяводстве названа Цудам Польшчы 2025 года ў апытанні National Geographic Traveler. Гэта дазволіла ёй трапіць у спіс самых прыгожых месцаў краіны.
Бжузкі – гэта вёска, упрыгожаная мураламі, натхнёнымі творчасцю Вінцэнта ван Гога, а таксама скульптурамі і каплічкамі. Жыхары ўносяць свой уклад у культуру гэтага месца, а вёска лічыцца галерэяй пад адкрытым небам.
Вёска Бжузкі была сярод 16 пераможцаў, па адным ад кожнага ваяводства, прызнаных рэдакцыяй і чытачамі як незвычайныя месцы, якія варта наведаць. Сёлетняе апытанне «Цуды Польшчы 2025» сабрала амаль 200 тысяч галасоў у інтэрнэт-галасаванні.
Бжузкі ўнікальныя тым, што на фасадах дамоў намаляваныя муралы, натхнёныя працамі Вінцэнта ван Гога, у тым ліку «Зорная ноч» і «Пшанічнае поле з кіпарысамі», што ў спалучэнні са скульптурамі і каплічкамі стварае ўнікальную мастацкую прастору.
Кіраўнік асацыяцыі «Артыстычныя Бжускі» Вальдэмар Башак падкрэслівае, што населены пункт – гэта галерэя пад адкрытым небам:
- У нас тут ёсць слоган: «Тут, дзе прырода дакранаецца да мастацтва». І вы можаце сапраўды адчуць гэта кожны дзень. Вы можаце наведаць Бжускі ў любы час года, у любы час сутак. Наша галерэя адкрыта 24/7. Вы можаце шпацыраваць, дыхаць свежым паветрам і любавацца тым, што намалявана на мурах на нашых невялікіх плошчах. З 2016 года на сценах нашых будынкаў, а не толькі дамоў, намаляваны муралы, натхнёныя працамі Вінцэнта ван Гога. У нас зараз 10 такіх муралаў, і ў нас ёсць планы яшчэ як мінімум на 2-3, якія, верагодна, будуць завершаны ў наступным годзе. Акрамя гэтых муралаў, у нас ёсць больш за 26 вулічных скульптур, размешчаных уздоўж дарогі. Ёсць і іншыя формы, такія як невялікія каплічкі анёлаў, і некалькі іншых цікавых рэчаў, якія, на маю думку, варта ўбачыць асабіста.
Паштовае аддзяленне Бжузак
Дзякуючы працы мясцовых жыхароў у Бжусках рэгулярна ўзнікаюць новыя аб'екты. Адзін з апошніх – мясцовая пошта, яна адыгрывае не толькі практычнае значэнне, але і мастацкае, расказвае Вальдэмар Башак:
- З аднаго боку, гэта мастацкае, але таксама практычнае, гэта наша так званае паштовае аддзяленне «Бжускі», куды можна адпраўляць лісты, а таксама жыхары могуць атрымліваць сваю пошту. Вядома, будынак мае ў пэўнай ступені мастацкі характар, бо там ёсць карціна, таксама натхнёная творчасцю Вінцэнта ван Гога, а менавіта вобраз паштальёна.
Жыхарка Бжусак Рамана Адамска гаворыць, што яшчэ 15-20 гадоў таму не думала, што вёска стане такой вядомай.
- Я думала, што тут нічога не зменіцца, што дамы будуць такімі ж, як і 50-60 гадоў таму. Але цяпер, дзякуючы ван Гогу і гэтым муралам, людзі пачалі купляць участкі, будаваць, вёска пачала ажываць і пашырацца. І гэта вельмі абнадзейвае. Столькі людзей наведваюць яе кожны дзень. Я бачу гэта, таму што мой двор выходзіць на вуліцу, і я бачу, як людзі крычаць «прывітанне» і хочуць пагаварыць, крычаць праз плот і хваляць, якая гэта прыгожая вёска. Прыязджаюць замежныя турысты, была жанчына з Англіі, з Нотынгема, Чыкага, Невады. І яны купілі ў мяне некалькі сувеніраў, некалькі вырабаў ручной работы і любаваліся імі. Я самаабвешчаная мастачка, якая прачнулася ўва мне праз 60 гадоў. Я навучылася гэтаму ад сваёй маці, калі была маленькай дзяўчынкай. Мне было 6-8 гадоў, і 60 гадоў я нічога з гэтым не рабіла. У мінулым годзе, у студзені, адразу пасля Новага года, я глядзела на гэтыя саломінкі і быццам нешта ўва мне прачнулася. Я ўзяла іх і рабіла павукоў усю зіму, да вясны, пакуль не пачала рабіць іх у садзе. І людзі, якія прыходзяць паглядзець на іх, сапраўды ў захапленні, любуюцца імі і фатаграфуюць.
Мурал на доме ў Бжузках
Бжузкі ўжо былі занесены ў Кнігу рэкордаў Гінеса як адна з самых маленькіх вёсак у Польшчы з найбольшай колькасцю муралаў на аднаго жыхара.
Адкуль узяўся Вінцэнт ван Гог у Бжузках? Солтыс вёскі Пётр Кавальскі расказваў National Geographic, што ван Гог паявіўся дзякуючы захапленню. Для жыхароў гэта спосаб унесці мастацтва ў паўсядзённае жыццё. У сваім асяроддзі яны знайшлі нешта блізкае да таго, што ён бачыў у сваіх родных Нідэрландах.
«Наш ландшафт падобны да галандскіх. Вакол нас прыгожая рака і цудоўны лес. Мы нават пачалі саджаць сланечнікі», – смяецца солтыс вёскі.
Пётр Кавальскі дадае, што дзякуючы мастацтву жыхары пачалі па-іншаму ўспрымаць наваколле. Разам яны падтрымліваюць парадак у вёсцы і саджаюць кветкі. Яны ганарацца тым, што турысты наведваюць іх, і хочуць быць гатовымі іх вітаць.
PR1/ав/фота: TwórczeBrzózki
слухайце аўдыё