У польскім горадзе Уроцлаў створаны беларуска-ўкраінскі музычны гурт «Навошта», у якім граюць падлеткі ва ўзросце ад 15-і да 18-ці гадоў. Цяпер юныя музыканты хочуць, каб да іх далучыліся польскія равеснікі.
«Цяпер мы дадаткова шукаем некага на вакал і клавішы, і гэта будзем рабіць сярод польскіх падлеткаў-музыкаў, каб паўстала сапраўдная інтэрнацыянальная каманда», – сказала заснавальніца і кіраўнік Фонду «Спадчына Беларусі» Анастасія Сасыкбаева. Недзяржаўная арганізацыя працуе ва Уроцлаве ўжо нейкі час, а нядаўна атрымала польскую рэгістрацыю.
Анастасія Сасыкбаева крыніца: асабісты архіў
Анастасія зазначыла, што фонд займаецца рознымі праектамі, звязанымі з моладдзю, у тым ліку інтэграцыйнымі, да якіх яна адносіць музычны гурт.
«Гэта таксама пытанне інтэграцыі, бо нам трэба будзе пахадзіць па музычных школах, гуртках, знаёміцца і прапанаваць удзел у нашым калектыве», – сказала дзяячка. Сасыкбаева падкрэсліла, што члены гурта выконваюць рок, самі пішуць тэксты і музыку. «Іх ужо, дарэчы, запрасілі на культурны фестываль у Германію ў верасні. Гэта ўжо аб нечым гаворыць», – кажа беларуска.
У размове з Беларускай службай Польскага радыё Анастасія Сасыкбаева расказала таксама пра іншыя дзіцячыя і моладзевыя праекты, якія рэалізуе альбо плануе рэалізаваць фонд. Гэта, у прыватнасці, дзіцячы летнік, жаночы праект, летні фестываль з удзелам розных беларускіх арганізацый, а таксама адукацыйна-інтэграцыйны праект з удзелам беларускай і польскай моладзі і дзяцей.
З Анастасіяй Сасыкбаевай размаўляў Валеры Саўко.
падрабязнасці – слухайце аўдыёфайл