Палякі масава здымаюць грошы з рахункаў, прызначаных на пенсію – чытаем на сайце Forsal.pl. Праграма PPK (Pracownicze Plany Kapitałowe - Планы фінансавага забеспячэння супрацоўнікаў) была ўведзеная ў 2019 годзе дзеля павелічэння зберажэнняў, якія можна будзе выкарыстаць на пенсіі. Частку сродкаў уносіць працаўнік, частку – наймальнік, ёсць таксама бонусы ад дзяржавы. Аднак аказваецца, што людзям больш патрэбныя грошы на дадзены момант. Летась з PPK было выплачана больш за 1,5 мільярда злотых. Гэта ў тры разы больш, чым у 2022 годзе.
Праграма была распрацаваная так, каб давала больш бонусаў асобам, якія сістэматычна адкладаюць сродкі. Зняўшы грошы пасля дасягнення пенсійнага ўзросту (60 гадоў для жанчын і 65 для мужчын), уладальнік атрымлівае ўсё - як уласныя ўзносы, так і ўзносы працадаўцаў і бонусы ад дзяржавы. Аднак некаторыя людзі разглядаюць праграму як інвестыцыю. Гэта звязана з тым, што грошы з PPK можна зняць з рахунку ў любы момант, да дасягнення пенсійнага ўзросту. Праўда, частка сродкаў, сабраных на рахунку, губляецца.
Прымаючы рашэнне скарыстацца сабранымі грашыма, некаторыя людзі правяраюць сістэму, ці сапраўды грошы можна зняць у любы момант. Жыхары Польшчы памятаюць, што здарылася з Адкрытымі пенсійнымі фондамі (OFE – Otwarte Fundusze Emerytalne. Сродкі, сабраныя ў фондах, былі ў значнай ступені нацыяналізаваныя ўладамі, каб палепшыць стан дзяржаўных фінансаў – рэд.). Аднак грошы, якія трапляюць на рахунак у PPK, з'яўляюцца цалкам прыватнымі, гэта значыць, іх кантралюе ўладальнік.
нг