Паводле дадзеных Галоўнага статыстычнага ўпраўлення Польшчы, у сакавіку было ўведзена ў эксплуатацыю 15,7 тысячы кватэр, што на 5,8% больш чым у лютым, — чытаем на партале biznesalert.pl.
У цяперашні час на рынку даступна амаль 230 тыс. кватэр, што з'яўляецца рэкордным узроўнем прапановы. Нягледзячы на тое, што многія з гэтых памяшканняў былі прададзеныя на этапе будаўніцтва, рост колькасці новых інвестыцый сведчыць аб тым, што прапанова будзе расці надалей.
Прагнозы паказваюць, што да 2027 года ў Польшчы будзе налічвацца 462 кватэры на 1 тыс. жыхароў, што наблізіцца да ўзроўню, зафіксаванага ў Даніі і Нідэрландах. Гэта вынік актывізацыі дзейнасці забудоўшчыкаў і павелічэння тэмпаў рэалізацыі інвестыцый. Павелічэнне актыўнасці забудоўшчыкаў з'яўляецца рэакцыяй на рост попыту на жыллё і стабілізацыю фінансавых умоў, такіх як працэнтныя стаўкі і даступнасць іпатэчных крэдытаў. Нягледзячы на тое, што ўрадавая праграмам Bezpieczny kredyt 2 procent была паступова спынена, яе наступствы працягваюць уплываць на рынак.
Пакупнікам пашанцавала
Аналітыкі падкрэсліваюць, што цяперашняя сітуацыя на рынку жытла ў Польшчы спрыяе пакупнікам. Большая канкурэнцыя сярод забудоўшчыкаў і больш шырокі выбар прапанаваных кватэр могуць прывесці да больш выгадных умоў куплі і пашырэння магчымасцей пакупнікоў весці перамовы.
Павелічэнне колькасці інвестыцый асабліва прыкметнае ў буйных агламерацыях, такіх як Варшава, Уроцлаў і Познань, дзе забудоўшчыкі сканцэнтравалі сваю дзейнасць на рэагаванні на мясцовыя патрэбы.
Эксперты прагназуюць, што калі цяперашнія тэмпы захаваюцца, рынак жылля ў Польшчы можа дасягнуць новага ўзроўню раўнавагі, задавальняючы патрэбы як пакупнікоў, так і інвестараў.
Для тых, хто плануе купіць кватэру, настаў добры час, каб паназіраць за рынкам і прааналізаваць даступныя прапановы, якія могуць быць больш прывабнымі, чым у папярэднія гады. Павелічэнне прапановы кватэр з'яўляецца станоўчым сігналам для ўсёй эканомікі, сведчыць пра ажыўленне будаўнічага сектара і павышэнне даверу інвестараў да стабільнасці рынку нерухомасці ў Польшчы.
эж