Дэзінфармацыя назаўсёды ўвайшла ў рэпертуар інструментаў, з дапамогай якіх расіяне хочуць уплываць на іншыя краіны, заявіў прэс-сакратар міністра-каардынатара спецслужбаў у Польшчы Станіслаў Жарын у выданні «Nasz Dziennik».
На пытанне, наколькі моцна Расія ўмешваецца ў інфармацыйную прастору Польшчы, Жарын заявіў, што «безумоўна, маем справу з класічнай дэзінфармацыяй і прапагандай».
«Яны (такія спробы – рэд.) пастаянна назіраюцца ў нашай інфармацыйнай прасторы, і трэба меркаваць, што яны будуць весціся на пастаяннай аснове – і гэта будзе працягвацца ў бліжэйшыя гады. Дэзінфармацыя стала адным з пастаянных інструментаў, якімі расіяне спрабуюць уплываць на іншыя краіны», – сказаў Жарын.
Паводле яго, асноўная дэзінфармацыйная дзейнасць тычыцца спробаў пасварыць украінцаў і палякаў.
«Расіяне спрабуюць пераканаць палякаў, што прымаць уцекачоў з Украіны надзвычай дорага і гэта выклікае шмат праблем, то бок прычыняецца да таго, што акцыя бессэнсоўная і небяспечная, таму што мы не ведаем, каго прымаем,і хто будзе нашым суседам. Мы таксама бачым падобны наратыў, адрасаваны ўкраінцам. Расія спрабуе пераканаць іх, што наша краіна вельмі небяспечная для іншаземцаў», – адзначыў прэс-сакратар міністра-каардынатара спецслужбаў у Польшчы.
«Відавочна, што польска-ўкраінскае збліжэнне закранае расійскія інтарэсы і таму Расія спрабуе падзяліць абодва народы. Гэтыя спробы можна заўважыць на палітычным і сацыяльным узроўнях, а таксама ў нашых паўсядзённых міжчалавечых адносінах. Такія дзеянні цяпер значна больш выразныя, чым іншыя, накіраваныя супраць Польшчы», – падкрэсліў Жарын.
«Мы таксама заўважаем, што расійская прапаганда вельмі ўважліва сочыць за падзеямі, якія адбываюцца ў нашай краіне. І практычна кожны дзень яна спрабуе адаптаваць свае дзеянні да таго, пра што актуальна паведамляюць СМІ. Гэта адбываецца з мэтай узмацніць інфармацыйнае ўздзеянне на нашую краіну», – дадае Станіслаў Жарын у размове з выданнем «Nasz Dziennik».
аз