Падчас выбарчай кампаніі 2023 года Дональд Туск сцвярджаў, што ніхто не мае намеру адпраўляць у Польшчу сілай «нават аднаго мігранта», і што Польшча будзе звольнена з механізму прымусовага перасялення, піша правае выданне Gazeta Polska Codziennie.
«Сёння мы ведаем, што гэта была хлусня, і на працягу некалькіх месяцаў немцы ўжо заліваюць Польшчу нелегальнымі мігрантамі». Паводле газеты, сітуацыя будзе пагаршацца, таму што непасрэдна ля польскай мяжы будзе адкрыты цэнтр, які паскорыць гэтую аперацыю. Акрамя таго, Олаф Шольц яшчэ раз пацвердзіў у СМІ, што Дональд Туск сапраўды мае намер рэалізаваць дамоўленасці міграцыйнага пакта.
Нягледзячы на тое, што міграцыйны пакт пачне цалкам рэалізоўвацца 1 чэрвеня 2026 года, тысячы нелегальных мігрантаў ужо перапраўляюцца ў Польшчу. «Германія ўжо адправіла ў суседнія краіны 47 тысяч чалавек», паведаміла нямецкае Міністэрства ўнутраных спраў.
Gazeta Polska Codziennie тлумачыць, што немцы карыстаюцца дзеючымі Дублінскімі правіламі, якія прадугледжваюць, што асобы, якія шукаюць прытулку, павінны прымацца ў першай краіне ЕС, у якую яны ўязджаюць.
- У Германіі тэма міграцыі на дадзены момант з'яўляецца адной з найважнейшых тэм выбарчай кампаніі. Канцлер Олаф Шольц хоча паказаць сябе публіцы жорсткім гульцом, здольным вырашаць праблемы, лічыць палітолаг Анджэй Ануш, да якога звярнулася выданне Gazeta Polska Codziennie.
яс