Нельга выключаць, што Расія зноў вырашыць арганізаваць нейкую авантуру, спадзеючыся, напрыклад, на распад НАТА. Аднак Расія прайграе, а НАТА не разваліцца, заявіў міністр замежных спраў Радаслаў Сікорскі ў інтэрв'ю выданню «Dziennik Gazeta Prawna».
Агенцтва «Reuters» 15 мая са спасылкай на двух амерыканскіх чыноўнікаў, якія выступілі ананімна, паведаміла, што Пентагон адмяніў планы ратацыйнага разгортвання 4 тысяч амерыканскіх вайскоўцаў у Польшчы. CNN, у сваю чаргу, паведаміў са спасылкай на крыніцы ў Пентагоне, што рашэнне міністра Піта Хегсета прыпыніць запланаваную ратацыю амерыканскай бранятанкавай брыгады было часткай намаганняў па скарачэнні амерыканскіх сіл у Еўропе. 1 мая Пентагон абвясціў аб вывадзе 5 тысяч амерыканскіх вайскоўцаў з Германіі.
У інтэрвʼю «DGP» міністр замежных спраў Радаслаў Сікорскі заявіў, што «сёння самае галоўнае, што прэзідэнт можа зрабіць для Польшчы, — гэта дамагчыся рэалізацыі абяцання, якое ён атрымаў падчас свайго першага візіту ў Вашынгтон».
— Мы лічым, што амерыканскія войскі павінны быць размешчаны там, дзе ёсць пагроза, гэта значыць на ўсходнім флангу. Аднак у выніку гэта амерыканскія рашэнні — мы фінансава падтрымліваем прысутнасць гэтых салдат у Польшчы, але большую частку выдаткаў на іх утрыманне нясуць амерыканцы, і менавіта яны прымаюць рашэнні аб іх разгортванні, — сказаў Сікорскі.
На пытанне, «ці паспрабуе Расія праверыць артыкул 5 у сітуацыі, калі еўрапейска-амерыканскія адносіны знаходзяцца ў крызісе?», ён адказаў, што «нельга выключаць, што Расія вырашыць пачаць чарговую эскалацыю, спадзеючыся, напрыклад, на распад НАТА».
— Але Расія прайграе, а НАТА не разваліцца, — падсумаваў Сікорскі.
На пытанне аб адносінах з Беларуссю ён сказаў, што «за апошнія 30 гадоў было некалькі еўрапейска-беларускіх або польска-беларускіх перазагрузак».
— Яны заўсёды заканчваліся аднолькава. Мы павінны спрабаваць, але не спадзявацца занадта, — зазначыў міністр замежных спраў.
Адказваючы на пытанне аб магчымасці вызвалення польскага прадпрымальніка Марʼяна Радзаеўскага, якога ў 2018 годзе адправілі ў расійскі лагер для ваеннапалонных, Сікорскі адзначыў, што «нам заўсёды патрэбна нейкая валюта для абмену».
— Мы імкнемся да вяртання ўсіх зняволеных палякаў і імкнемся да гэтага кожны раз. Я яшчэ сёння праверу статус спадара Радзаеўскага, — заявіў Сікорскі ў інтэрвʼю «DGP».
ав