Святлана Ціханоўская: Я адчуваю злосць на тое, што жанчыны не могуць адчуваць сябе ў бяспецы

25-гадовая беларуска Ліза памерла ў варшаўскай бальніцы праз некалькі дзён пасля згвалтавання і спробы забойства.

Здымак мае ілюстрацыйны характар.

Photo:_Alicja_ /pixabay.com/CC0 Public Domain

Дэмакратычная лідарка Беларусі Святлана Ціханоўская выказала спачуванні блізкім і сябрам 25-гадовай беларускі, якая 1 сакавіка памерла ў варшаўскай бальніцы праз некалькі дзён пасля згвалтавання і спробы забойства.

«Гэта проста невыносна! Мне складана апісаць увесь боль, што я адчуваю зараз. Але яшчэ я адчуваю злосць. Злосць на несправядлівасць. На тое, што жанчыны не могуць адчуваць сябе ў бяспецы. На тое, што нехта абвінавачвае ахвяру гвалту ў тым, што здарылася. У нашым свеце не павінна быць месца жорсткасці і гвалту. А вінаватыя ў такіх злачынствах павінныя быць пакараныя. Мае шчырыя спачуванні блізкім і сябрам. Светлая памяць Лізе», – напісала Святлана Ціханоўская.

Па падазрэнні ў нападзенні на беларуску быў затрыманы 23-гадовы жыхар Варшавы. Зараз ён знаходзіцца пад вартай. Яму прад'явілі абвінавачванне ў замаху на забойства, спалучанае са згвалтаваннем і разбоем. Зараз згаданае абвінавачванне можа быць змененае на забойства. Раней мужчына быў судзімы за захоўванне наркотыкаў і дробны крадзеж.

Як паведамлялася, на Лізу ён напаў у ноч з 24 на 25 лютага ў цэнтры Варшавы – прыставіў нож да горла, згвалтаваў і спрабаваў задушыць. Вартаўнік будынка знайшоў дзяўчыну без прытомнасці на лесвічнай клетцы. Падазраванага затрымалі ў той жа дзень.

аз