Суд у Вільні прысудзіў юрыста Мантаса Данелюса да 9 гадоў турмы за шпіянаж на карысць КДБ Беларусі, піша «Радыё Свабода».
Абвінавачанне зрабіла выснову, што беларуская прапагандыстка Ксенія Лебедзева інструктавала Данелюса, якую інфармацыю збіраць. Найбольш яе цікавілі беларускія арганізацыі ў Літве, шляхі эвакуацыі людзей з Беларусі, вучэнні добраахвотнікаў палка Каліноўскага і гэтак далей.
Данелюса таксама прызналі вінаватым у спробах уплываць на сведкаў. Пасля яго вызвалення з-пад арышту да суда, ён напісаў аднаму са сведкаў, што «точыць сякеру». Пасля гэтага літоўца зноў арыштавалі.
У апошнім слове літовец папрасіў суд яго апраўдаць.
Паліцыя затрымала Данелюса 28 верасня 2022 года па падазрэнні ў зборы і перадачы інфармацыі КДБ. Юрыст прапаноўваў дапамогу беларускім і ўкраінскім уцекачам, збіраў інфармацыю пра фінансы беларускіх і ўкраінскіх арганізацый і дапамогу, якую аказваюць Украіне, а таксама спрабаваў «процідзейнічаць» беларусам і ўкраінцам у Літве.
яс
