Паколькі адпаведныя злачынствы былі здзейсненыя як на тэрыторыі Беларусі, так і на тэрыторыі краін-удзельніц Рымскага статута, Міжнародны крымінальны суд патэнцыйна мае юрысдыкцыю.
Народнае антыкрызіснае ўпраўленне сабрала пераканаўчыя даныя, якія пацвярджаюць здзяйсненне дадзеных злачынстваў вышэйшым ваенна-палітычным кіраўніцтвам рэжыму. Гэтыя даныя былі перададзеныя ўраду Літвы для ацэнкі фактаў злачынстваў. Літоўскі бок прыйшоў да высновы, што маецца дастаткова падстаў меркаваць, што Лукашэнка і яго саўдзельнікі здзяйсняюць злачынствы супраць чалавечнасці.
«Літва стала першай краінай, якая скарысталася сваім правам у рамках Рымскага статута і звярнулася ў Міжнародны крымінальны суд, каб расследаваць злачынствы супраць чалавечнасці, здзейсненыя рэжымам ў Беларусі. Мы ўдзячныя ўраду Літвы за прынцыповае рашэнне і дзеянне. Для соцень тысяч пацярпелых, для ўсіх ахвяр рэпрэсій гэтае дае надзею. Надзею на справядлівасць, надзею на тое, што злачынствы не застануцца без пакарання. Вінаватыя павінны быць прыцягнутыя да міжнароднай адказнасці, рэпрэсіі – спыненыя. Усе незаконна асуджаныя павінны быць вызваленыя і рэабілітаваныя», – заявіла кіраўніца Аб'яднанага Пераходнага Кабінета Святлана Ціханоўская.
«Створаны гістарычны прэцэдэнт – бо ўпершыню ў гісторыі Міжнароднага крымінальнага суда дзяржава-ўдзельніца Рымскага статута перадала на разгляд Офіса пракурора сітуацыю ў дзяржаве, якая не з'яўляецца ўдзельніцай гэтага статута. Акрамя таго, упершыню ў фокусе ўвагі МКС будзе кантэкст маштабных міжнародных злачынстваў у Беларусі. І гэты крок, гэты прэцэдэнт і гэты працэс ужо нельга спыніць. Адказнасць за гэтыя злачынствы – немінучая. І тым важней, што гэта адбываецца, калі ўсе мы пражываем гістарычны момант, калі права сілы спрабуе аспрэчыць сілу права. Паверыўшы ў сваё «права сілы», аўтакраты і дыктатары спрабуюць перакроіць свет пад сябе. Але прыйшоў час для справядлівасці і правасуддзя. Лукашэнка марыў увайсці ў гісторыю. Яму гэта ўдалося. Ва ўсіх падручніках пра яго будуць успамінаць не як пра першага прэзідэнта, а як пра апошняга беларускага дыктатара і міжнароднага злачынцу», – падкрэсліў намеснік кіраўніцы Кабінета, кіраўнік НАУ Павел Латушка, які сёння прыехаў у Гаагу.
Беларускія дэмакратычныя сілы заклікаюць краіны-ўдзельніцы Рымскага статута падтрымаць намаганні літоўскага боку і агульнае імкненне ўсіх беларусаў – забяспечыць правасуддзе для соцень тысяч ахвяр і прыцягнуць Лукашэнку і яго саўдзельнікаў да адказнасці за злачынствы, якія ён здзейсніў і працягвае здзяйсняць.
АПК/ав