На пасяджэнні Цэнтральнай выбарчай камісіі 29 кастрычніка заявілі пра адмову ў рэгістрацыі ініцыятыўнай групы кіраўніка Руху «За Свабоду» Юрыя Губарэвіча па вылучэнні яго кандыдатуры на прэзідэнцкіх выбарах, паведаміла «Вясна».
Прычына, па якой Губарэвічу адмовілі ў рэгістрацыі - перадача дакументаў па электроннай пошце. На пасяджэнні адзначылі, што такі варыянт «не прадугледжаны заканадаўствам».
Пакуль зарэгістравана толькі ініцыятыўная група ад Аляксандра Лукашэнкі.
Юрый Губарэвіч, які знаходзіцца ў палітычнай эміграцыі, а Руху «За Свабоду» - ліквідаваны ў Беларусі, працягвае дзейнасць за мяжой.
«Позірк» распытаў палітыка, адкуль узнікла ідэя падаць дакументы ў такой сітуацыі.
«Была матывацыя патэсціраваць сістэму. Рэжым хацеў бы правесці працэс абсалютна стэрыльна і падкантрольна. Мая палітычная акцыя — гэта як раз спроба паказаць, што не ўсё так чыста і прыгожа, як будуць прапагандысты рэжыму даносіць да грамадзянаў Беларусі, не ўсё так стэрыльна, не ўсё так прыгожа, не ўсё так законна» - паясніў Губарэвіч.
Учора ЦВК адмовіла ў рэгістрацыі таксама групе Аляксандра Драздова. Невядомы кандыдат Аляксандр Драздоў не падаў спісу членаў ініцыятыўнай групы.
У сваю чаргу, як паведаміў тэлеканал АНТ, ЦВК прадстаўлены дакументы аб рэгістрацыі ініцыятыўнай групы па вылучэнні Алега Гайдукевіча кандыдатам у прэзідэнты.
Апошні дзень падачы дакументаў на рэгістрацыю ініцыятыўных груп - пятніца.
Нагадаем, на мінулым тыдні стала вядома дата чарговых прэзідэнцкіх выбараў, якія запланаваныя на 26 студзеня 2025 года.
аз