Камітэт Сейма Літвы па нацыянальнай бяспецы і абароне падтрымлівае ўвядзенне больш строгіх нацыянальных санкцый у дачыненні да грамадзян Расіі і Беларусі, паведамляе LRT.
У чацвер члены камітэта аднагалосна падтрымалі прапанову кансерватараў (Лаўрынаса Кашчунаса, Аўдронюса Ажубаліса і Валдаса Ракуціса) аб тым, што выдачу відаў на жыхарства ў Літве грамадзянам Беларусі, як і расіянам, трэба прыпыніць, калі ў іх няма дзеючай візы.
Дзеючыя віды на жыхарства павінны быць ануляваныя, калі грамадзяне Расіі і Беларусі здзейснілі паездкі ў Расію або Беларусь больш за адзін раз на працягу трох каляндарных месяцаў.
На думку кансерватараў, у Беларусі гэтыя людзі могуць быць завербаваныя спецслужбамі, ім можа быць даручана выкананне пэўных разведвальных функцый.
Выключэнне будзе прымяняцца да перавозчыкаў і вадзіцеляў грузавікоў, якія ідуць транзітам праз вышэйзгаданыя краіны або калі паездка мела аб'ектыўныя прычыны, якія не залежаць ад грамадзяніна.
На паседжанні камітэта ў чацвер гэтыя прапановы былі падтрыманыя прадстаўнікамі прэзідэнцкага ведамства і Дэпартамента дзяржаўнай бяспекі (ДДБ), але падвергліся крытыцы з боку бізнес-арганізацый.
Канчатковае рашэнне па вышэйпаказаных прапановах прыме Сейм.
аз