Да 10 000 еўра могуць атрымаць на навучанне беларусы, якія пацярпелі ад палітычных рэпрэсіяў

Еўрасаюз запусціў новую праграму падтрымкі навучання беларусаў, якія пацярпелі ад палітычных рэпрэсіяў.

Еўрасаюз запусьціў новую праграму падтрымкі навучання беларусаў, якія пацярпелі ад палітычных рэпрэсіяў

facebook.com/viachorka/скрыншот

Еўрасаюз у рамках ініцыятывы EU4Belarus — SALT аб’явіў пра запуск новай праграмы падтрымкі для грамадзян Беларусі, якія пацярпелі ад палітычных рэпрэсіяў і страцілі крыніцу даходу і магчымасць атрымаць адукацыю, паведамляе «Свабода».

Пра пачатак прыёму заявак паведаміў 6 красавіка ў Фэйсбуку старэйшы дарадца лідаркі дэмакратычных сілаў Беларусі Святланы Ціханоўскай Франак Вячорка.

Праграма разлічаная на былых палітвязняў, а таксама беларусаў і беларусак, якія зазналі адміністрацыйны або крымінальны палітычны пераслед.

На момант падачы заяўкі чалавек павінен пражываць (не раней за жнівень 2020 года) у адной з краін-сябраў ЕС або адной з краін Усходняга партнёрства (Арменія, Азербайджан, Беларусь, Грузія, Малдова, Украіна). Выключэнне могуць складаць заяўнікі, якія змогуць даказаць, што пакінулі Беларусь раней за жнівень 2020 года з прычыны рэпрэсіяў і пераследу, звязаных з прэзідэнцкімі выбарамі 2020 года.

Памер падтрымкі — да 10 000 еўра. На гэту суму ў межах праграмы адзін чалавек можа атрымаць падтрымку на:

- навучанне і зборы (прафесійная адукацыя, курсы павышэння кваліфікацыі, моўныя курсы, курсы ваджэння, сертыфікацыя, настрыфікацыя і іспыты);

- выдаткі на пераклад дакументаў;

- пражыванне ў інтэрнаце (для прафесійнай адукацыі да 12 месяцаў);

- грамадскі транспарт (для вочнага навучання працягласцю нe менш за 1 месяц);

- падпіскі на праграмнае забеспячэнне і лічбавыя платформы, неабходныя для навучання і перападрыхтоўкі.

Аплату будуць ажыццяўляць непасрэдна пастаўшчыкам паслуг адукацыі. Падаць заяўку на ўдзел у праграме можна па спасылцы. Тэрмін падачы заявак — да сакавіка 2027 года.

Таксама Франак Вячорка апублікаваў даведнік па працаўладкаванні для былых палітвязняў, якія вымушана пакінулі Беларусь (па-беларуску і па-расійску).

Раней у межах праграмы EU4Belarus — SALT Еўрасаюз ужо запускаў розныя праграмы стыпендыяў для рэпрэсаваных беларускіх студэнтаў, выкладчыкаў і навукоўцаў, праграму падтрымкі вызваленых беларускіх палітвязняў, праграму падтрымкі рэпрэсаваных беларусаў для праходжання моўных курсаў і бюракратычных працэдур.

аз