У Мінску адкрылася міжнародная вайсковая выстава Milex-2025. У ёй бяруць удзел больш за 150 кампаніяў з Беларусі, а таксама з Індыі, Ірану, Кітаю, Пакістану і Расіі.
На рэкордна вялікай выставачнай плошчы арганізатары абяцалі паказаць больш за 750 экспанатаў: узбраення, вайсковай і спецыяльнай тэхнікі.
Асобна арганізатары звяртаюць увагу на беларускія вайсковыя вырабы:
- зенітна-ракетны комплекс «Бук-МБ-2К» з першай беларускай зенітнай кіраванай ракетай,
- гранатамётны комплекс «Сапфір»,
- бронетранспартэр V-2,
- а таксама дроны і сродкі барацьбы з імі, зробленыя ў Беларусі.
Таксама ў прэс-рэлізе выставы паведамляюць, што на ёй пройдзе вайсковая канферэнцыя з удзелам каля 300 экспертаў і адмыслоўцаў.
Напярэдадні выставы праанансаваў сваю калекцыю на ёй і расійскі «Рособоронэкспорт». Ён пакажа новыя боепрыпасы, розную зброю, верталёты і агнямётныя сістэмы, сродкі супрацьпаветранай і радыёэлектроннай абароны, а таксама бранятэхніку, у тым ліку танк Т-90МС «Прорыв».
Сёлета выстава Milex-2025 месціцца ў новым Нацыянальным выставачным комплексе на вуліцы Паўліны Мядзёлкі ў Мінску, нагадвае «Свабода».
аз