BELPOL атрымаў дакументы, якія сведчаць аб заключэнні кантракта паміж Мінскім заводам колавых цягачоў (ААТ «МЗКЦ») і маскоўскім АТ «Абарончыя сістэмы» на пастаўку 30 спецыялізаваных колавых шасі. Згодна з дакументамі, расійскі заказчык павінен атрымаць 20 шасі МЗКЦ-8021-021, а таксама па пяць шасі МЗКЦ-8022-021 і МЗКЦ-80211-021. Пастаўкі запланаваны аж да 2029 года.
Кантракт заключаны на фоне маштабных міжнародных санкцый у дачыненні да МЗКЦ. Прадпрыемства знаходзіцца пад абмежаваннямі ЕС, Украіны, ЗША, Канады, Вялікабрытаніі, Швейцарыі, Аўстраліі і Новай Зеландыі, уведзенымі ў сувязі з падтрымкай расійскай агрэсіі супраць Украіны і ўдзелам у ракетных праграмах іншых дзяржаў.
Адмысловае значэнне мае прызначэнне замоўленай тэхнікі. Лінейка спецыялізаваных карпусных шасі МЗКЦ-8021/8022 стваралася для размяшчэння элементаў зенітнага ракетнага комплексу «Пячора-2М». Пасля гэтыя шасі таксама выкарыстоўваліся для сістэм супрацьпаветранай абароны і радыёлакацыйных станцый. Размова, такім чынам, ідзе пра платформы без сумневу прызначаныя для размяшчэння ваеннага абсталявання.
BELPOL адзначае, што заказ дазваляе выказаць здагадку, што расійскі бок разглядае магчымасць далейшага выкарыстання комплексаў «Пячора-2М» ці іншых сумяшчальных сістэм. На фоне дэфіцыту сродкаў СПА вяртанне да комплексаў савецкага паходжання можа мець практычны сэнс: наяўнасць запасаў адпаведных боепрыпасаў здольная зрабіць іх мадэрнізацыю і эксплуатацыю прывабнымі.
Гарызонт паставак да 2029 года сведчыць аб доўгатэрміновым характары замовы. Гэта не разавы закуп, а планамернае забеспячэнне расійскага заказчыка спецыялізаванымі платформамі.
Паводле BELPOL, выяўлены кантракт паказвае, што супрацоўніцтва МЗКЦ з расійскім абаронным сектарам працягваецца. За пералікам мадэляў і колькасцю адзінак стаіць канкрэтная роля беларускага прадпрыемства: пастаўка тэхнікі, на якой могуць размяшчацца сістэмы СПА і радыёлакацыйныя сродкі. І гэтая роля, мяркуючы па тэрмінах дамовы, разлічана яшчэ на некалькі гадоў. Гэта ўказвае на тое, што спыняць вайну агрэсар не плануе, перакананы BELPOL.
Белпол/ав