Мерапрыемства праходзіла ў Вільні і было арганізавана Міністэрствам замежных спраў Літвы і міжнароднай праваабарончай арганізацыяй «Freedom House».
Распавядаючы пра сітуацыю з правамі чалавека ў Беларусі, Алесь Бяляцкі падзякаваў усім, хто дабіваецца вызвалення палітычных вязняў рэжыму Лукашэнкі. Праваабаронца заклікаў да салідарнасці з беларускім дэмакратычным грамадствам.
Старшыня «Вясны» таксама паведаміў пра крытэры, выпрацаваныя беларускімі праваабарончымі арганізацыямі для ацэнкі сітуацыі: гэта вызваленне палітзняволеных, магчымасць высланым і з'ехаўшым беларускім грамадзянам бесперашкодна вярнуцца ў Беларусь, спыненне рэпрэсій і палітычна матываванага пераследу ў любых формах, мараторый на рэпрэсіўнае заканадаўства.
— Нам мала вызвалення палітычных зняволеных, нам неабходная свабода, — падкрэсліў Бяляцкі.
Сярод удзельнікаў Саміту — міністр замежных справаў Літвы Кястуціс Будрыс, кіраўнік Freedom House Джэймі Флай, нацыянальная лідарка Святлана Ціханоўская, украінскі журналіст і былы вязень данецкай турмы «Ізаляцыя» Станіслаў Асееў, прадстаўнікі дыпламатычнага корпуса, дэмакратычных рухаў і праваабаронцы Венесуэлы, Кубы і Нікарагуа. Задачай саміту было выпрацаваць практычныя рэкамендацыі для ўрадаў і міжнародных арганізацыяў па падтрымцы дэмакратычных рухаў і абароне людзей ад рэпрэсіяў.
Крыніца: ПЦ «Вясна»/юл