На гары Матэргорн, што на мяжы Швейцарыі і Італіі, 20 жніўня загінула грамадзянка Беларусі, 33-гадовая Кацярына Кліманская, паведамляе „Радыё Свабода” са спасылкай на італьянскае выданне Il Мessaggero.
Загінулая была добра трэніраваная і падрыхтаваная, ішла з дасведчаным сябрам-альпіністам з Украіны, які не пацярпеў. Выданне агучвае версію, што жанчына магла памерці ад хваробы.
Уздымацца на гару яны пачалі ўдзень, каля 5 гадзінаў вечара прыйшлі на падножжа праходу.
„Я падняўся наверх, але яна засталася ўнізе, яна стамілася, — расказаў ейны напарнік. — Спачатку я паслаў уніз канец вяроўкі. Яна не змагла падняцца, таму я падымаў яе. Яна была выматаная, сказала, што знясілілася. Упала на зямлю і не рэагавала”.
Мужчына сцвярджае, што пайшоў шукаць дапамогі, але не знайшоў нікога і не атрымаў адказу па рацыі, а калі вярнуўся, жанчына ўжо была нежывая. Толькі бліжэй да ночы яму ўдалося звязацца з ратавальнікамі, і тыя прыбылі раніцай.
Цела жанчыны даставілі на верталёце ў італьянскі горад Чэрвінію, цяпер справай займаецца паліцыя. Судовыя медычныя эксперты правяраюць цела жанчыны, каб пацвердзіць або абвергнуць дапушчэнне наконт хваробы.
аз