КДБ масава затрымлівае чыгуначнікаў за фота аварыі, якую хацелі ўтаіць, паведамляе «Наша Ніва» са спасылкай на «Супольнасць чыгуначнікаў Беларусі», паводле якой хваля затрыманняў працягваецца з 20 траўня. Толькі ў лакаматыўным дэпо «Мінск» 21 траўня схапілі шэсць машыністаў і памочнікаў машыніста.
Кіраўніцтва дэпо сцвярджае, што прычынай затрыманняў была перасылка ў мэсэнджарах і працоўных чатах фота аварыі 10 траўня, калі манеўраны лакаматыў сышоў з рэек каля станцыі «Мінск-Сартавальны». Паводле супольнасці чыгуначнікаў, аварыю спрабавалі ўтаіць.
З ліку шасці затрыманых, пра якіх вядома, трох вызвалілі праз тры дні, тры застаюцца затрыманымі. Прынамсі двум інкрымінуюць «спрыянне экстрэмізму» – імаверна, гаворка пра артыкул 361-4 Крымінальнага кодэкса, паводле якога могуць пакараць пазбаўленнем волі на тэрміны да 7 гадоў.
Абвінавачаных звольнілі, таксама «прапанавалі» звольніцца начальніку адной са станцый лакаматыўнага дэпо – усё за тую ж перасылку здымкаў супрацоўнікамі.
Супольнасць чыгуначнікаў адзначае, што затрыманні і звальненні адбываюцца на тле вострага недахопу кадраў на чыгунцы. І нават ва ўмовах зніжэння аб’ёму грузаперавозак звальненне шасці супрацоўнікаў будзе адчувальным для лакаматыўнага дэпо.
аз
