Мытня Літвы паведаміла, што з 4 чэрвеня ўводзяцца новыя правілы кантролю за вывазам у Беларусь і Расію легкавых аўтамабіляў, не старэйшых за 5 гадоў.
Як адзначаецца ў афіцыйным паведамленні, гэтыя захады прадугледжаны падпісаным 9 траўня ў Вільні пагадненнем аб прымяненні адзіных мераў кантролю за выкананнем санкцыяў Еўрасаюза супраць Беларусі і Расіі. Яго падпісалі кіраўнікі мытняў Літвы, Латвіі, Эстоніі, Польшчы і Фінляндыі, нагадвае «Свабода».
«Пры вывазе (рээкспарце або транзіце) легкавога аўтамабіля ў Беларусь, калі ён быў куплены фізічнай асобай, вывезці такі аўтамабіль зможа толькі ўладальнік (фізічная асоба, якая купіла аўтамабіль), а не блізкія сваякі на падставе дазволу ўладальніка машыны», – адзначаецца ў паведамленні.
Цяпер пропуск легкавых аўтамабіляў, не старэйшых за 5 гадоў, будзе ажыццяўляцца на падставе такіх дакументаў:
- дагавор куплі-продажу, а таксама дакумент, які пацвярджае атрыманне грошай ад пакупніка (выпіска з банкаўскага рахунку),
- транспартныя дакументы і дакументы аб аплаце перавозкі аўтамабіля да моманту яго перадачы атрымальніку ў трэцюю краіну – выпіска аб разліковым рахунку транспартнай кампаніі (калі аўтамабіль рухаецца не сваім ходам),
- даведка аб канчатковым атрымальніку (у выпадку, калі гэта юрыдычная асоба, – выпіска з пасведчання аб рэгістрацыі кампаніі) і тлумачэнне, дзе тавар будзе выкарыстоўвацца,
- абавязанні/пацверджанні ад экспарцёра і атрымальніка тавару аб тым, што тавар не прызначаны для Расіі і не будзе прададзены або іншым чынам перададзены для выкарыстання ў Расіі,
- перадача не пазней, чым праз 40 каляндарных дзён пасля вывазу, копіі мытнай дэкларацыі трэцяй краін, або іншага дакумента, які пацвярджае, што ў дачыненні да вывезеных аўтамабіляў працэдура мытнага афармлення адбылася з выкананнем міжнародных санкцый.
Асобна адзначаецца, што для вывазу аўтамабіляў, не старэйшых за 5 гадоў, таксама патрэбна падаваць дэкларацыю вытворцы.
Пры парушэнні гэтых патрабаванняў і атрыманні доказаў, што аўтамабілі вывезеныя ў трэція краіны і зарэгістраваныя ў Расіі, супраць экспарцёраў будуць заводзіць справы і па іх выніках уводзіць санкцыі.
аз