Большасць гарадскіх дэпутатаў Беластоку прагаласавала за перайменаванне вуліцы маёра Зыгмунта Шэндзеляжа «Лупашкі» на Падляскую. Вуліца насіла яго імя паўтара году. Праект у гэтай справе падрыхтавалі дэпутаты з Форуму меншасцяў Падляшша, якія ўваходзяць у склад Грамадзянскай кааліцыі.
Маёр Шэндзеляж быў адным з «выклятых жаўнераў», якія пасля вайны змагаліся ў антыкамуністычным падполлі. У ПНР яго прысудзілі да кары смерці. Прысуд быў выкананы 8 лютага 1951 года стрэлам у патыліцу. Некалькі дзясяткаў гадоў камуністы хавалі месца пахавання яго й іншых асуджаных. Толькі ў 2013 годзе былі знойдзеныя парэшткі «Лупашкі» на ўчастку «На Лончцы» на варшаўскіх Павонзках. Яго астанкі ўрачыста перапахавалі ў 2016 годзе на варшаўскіх Павонзках з удзелам прэзідэнта Польшчы і прадстаўнікоў ураду.
Паводле часткі гісторыкаў V Віленская брыгада Арміі Краёвай, якой камандаваў маёр Зыгмунт Шэндзеляж «Лупашка», правяла пацыфікацыю беларускіх і літоўскіх вёсак у 1944 годзе.
Паседжанне гарадской рады прайшло з удзелам жыхароў і было вельмі эмацыйным. Прысутнічалі гараджане, якія лічаць Шэндзеляжа героем, і тыя, хто называе яго забойцам.
ав