Польшча будзе працягваць сачыць за імпартам з Украіны. Гаворка ідзе пра такія прадукты, як яйкі, мука, мяса птушкі, яблычны сок і мяккая садавіна, якіх не ахапіла забарона Еўракамісіі на ўвоз у пяць краін, якія мяжуюць з Украінай, часткі сельскагаспадарчых прадуктаў.
Нагадваем, на пачатку траўня ЕС увёў забарону на ўвоз у Польшчу, Балгарыю, Румынію, Славакію і Венгрыю пшаніцы, кукурузы, рапсу і сланечніку з Украіны. Астатнія прадукты застаюцца пад наглядам Еўракамісіі, якая ў неабходнасці можа ўвесці ў дачыненні да іх квоты і пошліны.
Міністр сельскай гаспадаркі Роберт Тэлюс(Robert Telus) запэўніў, што спрэчныя прадукты застануцца пад кантролем:
- Мы плануем надалей канваяваць гэтыя тавары; пільнаваць, каб яны выехалі з Польшчы. Мы хочам ведаць – адкуль яны прыязджаюць, дзе разгружаюцца і ці канчаткова пакідаюць тэрыторыю Польшчы. Гаворка ідзе пра тое, каб украінскі імпарт не парушыў польскага рынку.
Роберт Тэлюс падкрэсліў, што Польшча разам з Балгарыяй, Румыніяй, Славакіяй і Венгрыяй таксама будзе хадайнічаць за прадаўжэнне цяперашняй забароны на імпарт часткі сельскагаспадарчых прадуктаў, якая дзейнічае да 5 чэрвеня.
IAR/аз
