Партыі «Польшча 2050» (Polska 2050) і «Польская сялянская партыя» (Polskie Stronnictwo Ludowe PSL) пойдуць на гэтыя выбары разам – заявіў на канферэнцыі Шыман Галоўня (Szymon Hołownia), кіраўнік «Польшчa 2050». Гэта пацвердзіў Уладзіслаў Касіняк-Камыш (Władysław Kosiniak-Kamysz), старшыня «Польскай сялянскай партыі». Абодва лідары правялі сумесную прэс-канферэнцыю, прысвечаную будучыні створанай выбарчай кааліцыі «Трэці шлях».
Шыман Галоўня дадаў, што «ўдалося дамовіцца аб добрай, празрыстай і адкрытай кааліцыі».
- Яна пакажа, як сёння можа выглядаць новая палітыка ў Польшчы. (...) Мы дасягнулі пагаднення для мільёнаў палякаў, якія жадаюць мець за каго галасаваць... – сказаў ён.
Галоўня адзначыў, што ў выбарчых спісах не будзе ненадзейных кандыдатаў, якія ў будучыні маглі б перайсці на бок ПіС.
– Мы добра ведаем, наколькі важна сёння спыніць «Права і справядлівасць» і «Канфедэрацыю» (ультра кансерватыўная групоўка - рэд.). «Трэці шлях» – гэта адзіны шлях, які можа эфектыўна прывесці да гэтага - падкрэсліў Галоўня.
яс