Міністэрства замежных справаў Польшчы паведаміла ў камюніке, што ў адпаведнасці з папярэднім рашэннем урада Расіі сёння афіцыйна закрыта консульская ўстанова ў Смаленску. На кароткай цырымоніі прысутнічаў амбасадар Польшчы ў Расіі Кшыштаф Краеўскі ды іншыя дыпламаты.
Установа працавала 11 гадоў. Яе праца пачалася ў другую гадавіну катастрофы прэзідэнцкага самалёта ў Смаленску. Супрацоўнікі займаліся польскімі консульскімі справамі і даглядалі месца катастрофы Ту-154 і могілкі ў Катыні, дзе спачываюць палякі, забітыя саветамі падчас Другой сусветнай вайны.
Міністэрства замежных справаў Польшчы выказалася супраць рашэння расійскіх уладаў. У ліпені прэмʼер-міністр Матэвуш Маравецкі заявіў, што ў выпадку закрыцця расіянамі польскіх дыпламатычных установаў Польшча адкажа сіметрычна.
IAR/вх
