Заўтра Польшча пераймае старшынства ў Радзе ЕС

Афіцыйная інаўгурацыя польскага старшынства ў Радзе ЕС адбудзецца 3 студзеня ў Варшаве.

Сцяг ЕС

Ralph/pixabay.com/CC0 Public Domain

Сёння апошні дзень вугорскага старшынства ў Радзе Еўрасаюза. 1 студзеня гэтую функцыю бярэ на сябе Польшча.

Намесніца міністра па еўрапейскіх справах Магдалена Сабковяк-Чарнэцка(Magdalena Sobkowiak-Czarnecka) прызнае, што чаканні ад Польшчы вялікія. «Мы адчуваем ціск і вялікія надзеі», - сказала яна:

- Факт, што Польшча пераймае старшынства ад Венгрыі выклікае вялікія чаканні з боку нашых партнёраў. На агульную атмасферу дадаткова паўплывалі апошнія крокі Віктара Орбана, у тым ліку жэсты ў дачыненні да Крамля. Гэта не будуць простыя шэсць месяцаў. Нагадваю, 20 студзеня адбудзецца інаўгурацыя прэзідэнта Дональда Трампа. Пазней выбары ў Германіі, у Францыі. Гэта перыяд зменаў. Таму моцнае старшынства Польшчы несумненна патрэбнае.

Нагадваем, у ліпені старшыня Еўракамісіі агучыла ініцыятывы на першыя сто дзён дзейнасці камісіі, якія супадаюць з польскім старшынствам у ЕС. Сярод прыярытэтаў: фінансаванне абароннай прамысловасці.

З 1 студзеня Польшча будзе адказваць за арганізацыю працы краін-членаў, у тым ліку парадак дня, які змяшчае апрацоўку новых прававых актаў, працэсы ўступлення краін і рашэнні адносна міжнароднай палітыкі, у тым ліку санкцый.

Афіцыйная інаўгурацыя польскага старшынства ў Радзе ЕС адбудзецца 3 студзеня падчас урачыстасці ў Вялікім тэатры - Нацыянальнай оперы ў Варшаве.

IAR/аз